सिक्किम च्याम्बर अफ कमर्सले जनायो केन्द्रिय बजेटलाई स्वागत

गान्तोक, 02 फरवरी । सिक्किम च्याम्बर अफ कमर्सका अध्यक्ष अमर अग्रवालले केन्द्रिय बजेट २०२६–२७ लाई स्वागत जनाएका छन्। उनले बजेटमा आर्थिक वृद्धि तथा वित्तीय अनुशासनलाई सन्तुलित रूपमा अघि बढाइएको उल्लेख गर्दै भारत सरकारको दृष्टिकोणको प्रशंसा गरेका छन्।अध्यक्ष अग्रवालले आज प्रेस बयानमा भने, ‘पूर्वाधार विकास, पुँजीगत खर्च तथा कनेक्टिभिटीमा निरन्तर जोड दिइनुले दीर्घकालीन आर्थिक वृद्धिलाई मजबुत बनाउनुका साथै रोजगारी सिर्जनामा महत्वपूर्ण भूमिका खेल्नेछ।’ विशेष रूपमा उनले अरुणाचल प्रदेश, असम, मणिपुर, मिजोरम, त्रिपुरासहित सिक्किमलाई पनि समेट्ने “बौद्ध सर्किट विकास योजना” मा समावेश गरिएकोमा खुशी व्यक्त गरेका छन्। उनले भने, ‘बजेटमा उल्लेख गरिएअनुसार यस योजनाले मन्दिर र गुम्बाहरूको संरक्षणमा ध्यान केन्द्रित गर्दै उत्तरपूर्व भारतको समृद्ध आध्यात्मिक सम्पदालाई उजागर गर्ने उद्देश्य राखेको छ। पर्यटन नै जीविकोपार्जन र साना व्यवसायको प्रमुख आधार रहेको सिक्किमका लागि यस योजनाले होटल व्यवसायी, टुर अपरेटर, यातायात सेवा प्रदायक, हस्तकला व्यवसायी तथा युवा उद्यमीहरूका लागि नयाँ अवसरहरू सिर्जना गर्नेछ।’ उनले स्वास्थ्य, शिक्षा, ग्रामीण विकास र महिला सशक्तीकरण सम्बन्धी योजनामा निरन्तर सहयोग साथै केन्द्रिय कर बाँडफाँड र अनुदानले सिक्किम जस्तो चुनौतीपूर्ण भौगोलिक अवस्थासहितका राज्यहरूलाई आवश्यक वित्तीय स्थायित्व प्रदान गर्नेछ भनी विश्वास व्यक्त गरेका छन्।उनले बजेटमा तत्काल कर छुटको व्यवस्था नरहेता पनि क्षेत्रीय विकास, पर्यटन प्रवर्द्धन र उद्यमशीलता वृद्धिमा केन्द्रित दृष्टिकोण उत्साहजनक रहेको बताएका छन्। उनले सिक्किमको व्यवसायिक समुदायको तर्फबाट सिक्किमको सम्भावनालाई पहिचान गरी दिगो र समावेशी विकासतर्फको यात्रामा सहयोग पुर्‍याएकोमा केन्द्रिय वित्त मन्त्री र भारत सरकारप्रति हार्दिक आभार व्यक्त गरेका छन्।