गान्तोक, 13 अप्रेल। मुख्यमन्त्री प्रेमसिंह तामाङले आज बिहान गेजिङ जिल्लाको मिडल ओमचुङमा डम्बरसिंह राई र उनको परिवारले सञ्चालन गरिरहेको सोताङ रेस्टुरेन्ट भ्रमण गरे। मुख्यमन्त्रीले उनीहरूको व्यवसायलाई समर्थन गर्न सहयोगको आश्वासन पनि दिएका छन्।
मुख्यमन्त्री तामाङले सामाजिक सञ्जालमा आज बिहान डम्बरसिंह राई र उनको परिवारद्वारा सञ्चालित ह्रदयस्पर्शी सानो व्यवसाय ‘सोताङ रेस्टुरेन्ट’ भ्रमण गर्ने अवसर जुरेको जानकारी गराएका छन्। छोटो कुराकानीको क्रममा राईले यो सानो रेस्टुरेन्ट विगत केही वर्षदेखि चलाइरहेको थाहा पाएको उनले बताएका छन्।
मुख्यमन्त्रीले आफूलगायत उनको टोलीलाई यहॉंको आलु पराठा खुबै मन परेको आफ्नो पोस्टमा उल्लेख गरेका छन्। उनले वर्तमानमा सबैजना सरकारी नोकरीको पछाडि दौडिरहेको अवस्थामा उनको परिवार उद्यमशीलताको भावनाका साथ अगाडि बढिरहेको देख्दा आफू निकै प्रभावित बनेको अनुभव साझा गरेका छन्।
मुख्यमन्त्रीले जतिसुकै सानो भए पनि आफ्नो बलबुतामा केही गर्ने मानिसहरूमा साँच्चै प्रेरणादायी कुरा हुन्छ भन्दै राई परिवारको सराहना गरेका छन्। उनीहरूको यस यात्रालाई समर्थन जनाउन उनले किचन र बाथरुम मर्मत गर्न सहयोग गर्ने आश्वासन पनि दिएका छन्।
मुख्यमन्त्रीले डम्बरसिंह राई र उनको परिवारलाई शुभकामना दिॅंदै उनीहरूको उद्यमको प्रगतिको कामना गरेका छन्। मुख्यमन्त्रीको साथमा सिक्किम विधानसभाको अध्यक्ष एमएन शेर्पा र विधायक एलएन शर्मा पनि सामेल थिए।
