नगर पालिका चुनाउ 2026 मा एसकेएम उम्मेदवारहरू निर्विरोध निर्वाचित बन्ने संकेत

गान्तोक, 28 मार्च । सिक्किमका शहरी स्थानीय निकायहरूमा प्रस्तावित नगर पालिका चुनाउ 2026 लाई लिएर मनोनयन पत्र बुझाउने शनिवार छैटौं दिन हो। अहिलेसम्म सत्तारुढ़ सिक्किम क्रान्तिकारी मोर्चा (एसकेएम) पार्टीका उम्मेदवारहरूले मात्र मनोनयन पत्र बुझाएका छन्। मनोनयन पत्र बुझाउने अन्तिम मिति 30 मार्च निर्धारित छ।
सिक्किम राज्य चुनाउ आयोगले गत 23 मार्चका दिन राज्यमा नगर पालिका चुनाउ 2026 घोषणा गरेको थियो। चुनाउ घोषणा भएकै सॉंझ सत्ताधारी एसकेएम पार्टीले राज्यका 9 शहरी स्थानीय निकायका सबै वार्डहरूका लागि आफ्ना उम्मेदवारहरूको सूची जारी गऱ्यो। यसपछि, 26 मार्चका दिन एसकेएमका सबै उम्मेदवारहरूले आफ्ना मनोनयन पत्रहरू बुझाए।
अहिलेसम्म एसकेएम पार्टी बाहेक अन्य कुनै पनि राजनीतिक दलका सदस्यहरू अथवा स्वतन्त्र उम्मेदवारहरूले मनोनयन पत्र बुझाएका छैनन्। विपक्षी राजनीतिक दलहरू सिक्किम डेमोक्रेटिक फ्रण्ट र सिटिजन एक्सन पार्टीले आगामी नगर पालिका चुनाउमा भाग नलिने घोषणा गरिसकेको छ। विपक्षीहरूले विशेष गरी नगर पालिका चुनाउमा विभिन्न समुदायहरूलाई लिएर गरिएको आरक्षण व्यवस्थाप्रति असन्तोष प्रकट गर्दै चुनाउ वाहिष्कार गरिरहेको जनाएका छन्।
अर्कातिर, भाजपा र कांग्रेस जस्ता राष्ट्रिय राजनीतिक दलहरूले नगर पालिका चुनाउलाई लिएर अहिलेसम्म कुनै प्रकारको आधिकारिक बयान दिएको छैन। भोलि, आइतवार मनोनयन पत्र बुझाउन सकिने छैन। सोमवार मनोनयन पत्र बुझाउने अन्तिम मिति हो। सोमवार पनि यदि कसैले मनोनयन पत्र नबुझाए एसकेएम पार्टीका सबै उम्मेदवारहरू निर्विरोध निर्वाचित बन्ने संकेत देखिॅंदैछ।