नगर पालिका चुनाउ: नाम्ची, सोरेङ, पाकिम र मङ्गनमा 17 जना उम्मेदवार चुनावी मैदानमा

गान्तोक, 30 मार्च। नाम्ची जिल्लाको नाम्ची नगर परिषद (एनएमसी) र नयॉं बजार जोरथाङ नगर पञ्चायत चुनाउका लागि आज केवल एउटा मनोनयन पत्र बुझाइएको छ। उक्त मनोनयन पत्र एनएमसीको अप्पर घुर्पिसे वार्डका लागि भारतीय जनता पार्टीका उम्मेदवार साङ्गे भोटियाले बुझाएका छन्। उनले जिल्लाकी चुनाउ अधिकारी अनुपा तामलिङलाई आफ्नो मनोनयन पत्र बुझाए।
नगर पालिका चुनाउ 2026 का लागि आज मनोनयन पत्र बुझाउने अन्तिम दिन थियो। नाम्ची जिल्लाका लागि कुल 14 मनोनयन पत्र बुझाइएको छ। एनएमसीका 7 वार्ड मध्ये 9 मनोनयन पत्र तथा नयॉं बजार जोरथाङ नगर पञ्चायतका 5 वार्डका लागि 5 मनोनयन पत्र मात्र प्राप्त भएको छ।
यसरी नै सोरेङ नगर पञ्चायतमा हुन लागिरहेको चुनाउका लागि आज मनोनयन पत्र बुझाउने अन्तिम दिन एक उम्मेदवारले मनोनयन पत्र बुझाए। भारतीय जनता पार्टीका उम्मेदवार नरेन सुब्बाले डॉंड़ा बजार वार्डका लागि आज चुनाउ अधिकारी धिरज सुबेदीलाई आफ्नो मनोनयन पत्र बुझाए।
यसरी नै पाकिम जिल्ला अन्तर्गत पाकिम नगर पञ्चायत र रम्फू नगर पञ्चायतका लागि आज दुई जना उम्मेदवारले मनोनयन पत्र बुझाए। रम्फू नगर पञ्चायतको अप्पर बजार वार्डका लागि एक स्वतन्त्र उम्मेदवार बिनय थापाले तथा मण्डी बजार वार्डका लागि भारतीय जनता पार्टीका उम्मेदवार भुपाल बराइलीले मनोनयन पत्र बुझाएका छन्। उल्लेखनीय छ, पाकिम र सोरेङमा पहिलो पटक नगर पालिका चुनाउ हुन लागिरहेको छ।
अर्कातिर, मङ्गन नगर पञ्चायतको पॉंचवटा वार्डका लागि आज एकै जना उम्मेदवारले पनि मनोनयन पत्र बुझाएनन्।
उल्लेख्य, मनोनयन पत्रको जॉंच आगामी 1 अप्रेलका दिन हुनेछ भने मनोनयन पत्र फिर्ता लिने अन्तिम मिति 4 अप्रेल रहेको छ। यसैगरी, 24 अप्रेलका दिन मतदान हुनेछ भने 25 अप्रेल, 2026 का दिन मतगणना हुनेछ।