सोरेङमा चन्द्रहाङ सुब्बामाथि भएको आक्रमण प्रकरणमा मुख्य योजनाकारसहित चार अभियुक्त पक्राउ

सोरेङ, २२ जून । सोरेङ जिल्ला पुलिसले खोलाटार निवासी चन्द्रहाङ सुब्बामाथि गत १० जून, २०२६ मा तीन जना अज्ञात मुखौटा लगाएका व्यक्तिहरूद्वारा गरिएको आक्रमणको घटनामा महत्वपूर्ण सफलता हासिल गरेको छ। यस घटनाको सम्बन्धमा सोरेङ पुलिसले तीन जना आरोपीलाई पक्राउ गरेको छ।सोरेङ जिल्लाका पुलिस अधीक्षक नहकुल प्रधानले आज बताए अनुसार, शुरुआतमा ‘ब्लाइन्ड केस’ का रूपमा रहेको यस संवेदनशील घटनाको जाँच निरन्तर, सूक्ष्म तथा प्राविधिक निगरानीका माध्यमबाट अगाडि बढाइयो। विश्वसनीय पुलिस तथा सर्वसाधारण स्रोतबाट प्राप्त सूचनाका आधारमा जाँच टोलीले गान्तोक र सिलगढ़ीबाट तीन जना अभियुक्तलाई पक्राउ गर्न सफल भएको छ। पक्राउ परेका अभियुक्तहरूलाई अदालतमा उपस्थित गराई न्यायिक हिरासतमा पठाइएको छ। घटनामा प्रयोग गरिएको गाडी पनि पुलिसले नियन्त्रणमा लिएको छ।पक्राउ परेका अभियुक्तहरूमा लोअर थाम्बोङ, दारामदिन निवासी दीपेश भुजेल (२८) रहेका छन्। उनी यस हमलाकाण्डका मुख्य अभियुक्त रहेको बताइएको छ। यसैगरी, कमारगाउँ, तिमी तार्कु निवासी पिटर लिम्बू (३१) र श्रीबादाम, सोरेङ जिल्ला निवासी कृष्णबहादुर गुरुङ (५४) लाई पक्राउ गरिएको छ। यसैबीच, घटनाका कथित मुख्य योजनाकार रुम्बुक बस्ती, सोरेङ जिल्ला निवासी अशबीर सुब्बा (३७) लाई सोमबार बिहान पुलिसले पक्राउ गरेको छ। पुलिसका अनुसार, निरन्तर अनुगमन, प्राविधिक निगरानी तथा सूचनामूलक कारबाहीका आधारमा आरोपीको पक्राउ सम्भव भएको हो। पुलिसले घटनामा संलग्न अन्य दुई फरार अभियुक्तको खोजी कार्य तीव्र रूपमा जारी रहेको र उनीहरूको गतिविधिमाथि नजिकबाट निगरानी राखिएको बताएको छ।जाँचका क्रममा दार्जिलिङ जिल्लाको बिजनबारी क्षेत्रबाट प्राप्त सीसीटीभी फुटेज अत्यन्तै महत्वपूर्ण प्रमाण सावित भएको पुलिसले जनाएको छ। उक्त फुटेजले अभियुक्तहरूको गतिविधि पहिचान तथा ट्र्याक गर्न महत्त्वपूर्ण भूमिका खेलेको थियो। पुलिस अधीक्षक प्रधानले जाँच टोलीको प्रशंसा गर्दै अतिरिक्त पुलिस अधीक्षक, एसडीपीओ सोरेङ, सोमबारिया पुलिस, जाँच अधिकारी पीआई सोवित खत्री तथा जाँचमा संलग्न सम्पूर्ण पुलिस कर्मचारीहरूको योगदान सराहनीय रहेको बताए। उनले मङ्गन र सदर पुलिस थाना, सोरेङ तथा गान्तोक साइबर सेल, दार्जिलिङ पुलिस, सामाजिक अभियन्ता राजु नेपाली र उनको टोली तथा रुम्बुक र खोटातारका स्थानीयवासीप्रति पनि आभार व्यक्त गरेका छन्।