गान्तोक, 13 अक्टोबर। सिक्किम आक्रमण स्पोर्टिङ क्लब प्रतिष्ठित राज्यपाल स्वर्ण कप फुटबल प्रतियोगिता २०२६ को फाइनलमा प्रवेश गरेको छ। यहाँको पाल्जोर स्टेडियममा मङ्गलबार सम्पन्न पहिलो सेमिफाइनल खेलमा सिक्किम आक्रमणले गोकुलम केरला लाई ३-२ गोलले पराजित गर्दै फाइनलमा आफ्नो स्थान सुरक्षित गरेको हो।रोमाञ्चक प्रतिस्पर्धात्मक खेलमा सिक्किम आक्रमणका लागि खेल शुरु भएको दुई मिनेटमै जर्सी नम्बर ९ का देवाशिष राईले पहिलो गोल गर्दै टोलीलाई अग्रता दिलाएका थिए। त्यसपछि गोकुलम केरलाका जर्सी नम्बर २० का क्रिस्लानले खेलको २७औँ मिनेटमा गोल गर्दै खेललाई बराबरीमा पुर्याए। पहिलो हाफको खेल एक-एक गोलको बराबरीमा समाप्त भयो।दोस्रो हाफमा गोकुलम केरलाका क्रिस्लानले नै खेलको ५४औँ मिनेटमा व्यक्तिगत दोस्रो गोल गर्दै गोकुलम केरलालाई २-१ को अग्रता दिलाए। तर सिक्किम आक्रमणका जर्सी नम्बर ७ का बक्सरले ५९औँ मिनेटमा गोल गर्दै खेललाई पुनः बराबरीमा ल्याए।निर्धारित समयको अन्तिम क्षणसम्म प्रतिस्पर्धा जारी रहँदा खेलको अतिरिक्त समयको ९०औँ मिनेटपछिको तेस्रो मिनेट अर्थात् ९०+३औँ मिनेटमा सिक्किम आक्रमणका जर्सी नम्बर १६ का नुहुले पेनल्टीमार्फत निर्णायक गोल गरे। उनको गोलसँगै सिक्किम आक्रमणले ३-२ को जित दर्ता गर्दै फाइनलको यात्रा तय गर्यो। ग्रामीण विकास विभागका मन्त्री अरुण उप्रेती आज प्रमुख अतिथि तथा सिम्फेडका सल्लाहकार आनन्द लामा र मुख्यमन्त्रीका राजनीतिक सचिव जेकब खालिङ विशिष्ट अतिथिका रूपमा उपस्थित थिए।यसैबीच, प्रतियोगिताअन्तर्गत बुधबार दोस्रो सेमिफाइनल खेल सिङलिङ स्पोर्टिङ क्लब र शिलङ लाजोङबीच साँझ ५ बजी हुनेछ। उक्त खेलको विजेताले फाइनलमा सिक्किम आक्रमणसँग उपाधिका लागि प्रतिस्पर्धा गर्नेछ।
