जनतासँग निरन्तर सम्पर्क तथा समर्पित सेवाबाट मात्र बलियो राजनीतिक संगठन निर्माण हुनेछ: गणेश राई

गान्तोक, 14 जुलाई। सिटिजन एक्सन पार्टी (सीएपी) सिक्किमको आज गान्तोक जिल्ला कार्यकारिणी परिषद्को समन्वय बैठक सम्पन्न भयो, जसको अध्यक्षता पार्टी अध्यक्ष गणेश के. राईले गरेको थियो। पार्टी मुख्यालयमा सम्पन्न बैठकमा जिल्लाको संगठनात्मक प्रगतिको समीक्षा गर्नुका साथै तृणमूल तहसम्म पार्टी संगठनलाई अझ सुदृढ़ बनाउने कार्ययोजनामाथि छलफल गरिएको थियो।बैठकमा गान्तोक जिल्लामा पार्टीका संगठनात्मक गतिविधिहरूको विस्तृत समीक्षा गरिएको प्रेस विज्ञप्तिमा उल्लेख छ। सहभागीहरूले वर्तमान राजनीतिक अवस्था, संगठनात्मक तयारी तथा प्रत्येक निर्वाचन क्षेत्र, वार्ड र मतदान केन्द्रसम्म पार्टीको पहुँच विस्तार गर्ने रणनीतिबारे छलफल गरे। जिल्ला नेतृत्व, निर्वाचन क्षेत्र समिति, भ्रातृ संगठन तथा तल्लो तहका कार्यकर्ताबीच अझ प्रभावकारी समन्वय गर्दै संगठनात्मक संरचना सुदृढ़ बनाउने विषयमा विशेष जोड दिइयो।कार्यक्रमलाई सम्बोधन गर्दै पार्टी अध्यक्ष राईले अनुशासन, एकता, जनतासँग निरन्तर सम्पर्क तथा समर्पित सेवाबाट मात्र बलियो राजनीतिक संगठन निर्माण हुने बताए। उनले जिल्ला तथा निर्वाचन क्षेत्रका पदाधिकारीहरूलाई जनसम्पर्क कार्यक्रमलाई तीव्र बनाउँदै मतदान केन्द्रस्तरसम्म संगठन विस्तार गर्न र स्थानीय समस्यालाई नजिकबाट बुझेर समाधानका लागि सक्रिय हुन आग्रह गरे। साथै पारदर्शिता, जवाफदेहिता र जनमुखी राजनीतिका मूल्य-मान्यतालाई आत्मसात् गर्न पार्टी कार्यकर्तालाई आह्वान गरे।पार्टी अध्यक्ष राईले हाल सञ्चालन भइरहेको मतदाता नामावलीको विशेष गहन पुनरीक्षण (एसआईआर) अभियानको महत्वबारे प्रकाश पार्दै पार्टीका सम्पूर्ण नेता, पदाधिकारी र कार्यकर्तालाई योग्य नागरिकहरूलाई आवश्यक सहयोग गर्न आग्रह गरे। उनले प्रत्येक योग्य मतदाताले कुनै असुविधाबिना आवश्यक प्रक्रिया पूरा गर्न सकून् भन्ने सुनिश्चित गर्न फाराम भर्न, कागजात प्रमाणीकरण गर्न तथा प्रक्रियासम्बन्धी जिज्ञासा समाधान गर्न सहयोग गर्नुपर्ने बताए। कुनै पनि योग्य मतदाता निर्वाचन प्रक्रियाबाट वञ्चित नहोस् भन्ने उद्देश्यका साथ यो अभियान जनसेवाको भावनाले सञ्चालन गर्नुपर्नेमा उनले जोड दिए।