गान्तोक, 11 अगस्त। सिक्किम फुटबल संघ (एसएफए) को आयोजनामा तथा सिक्किम सरकारको गृह विभागको तत्वावधानमा ८०औँ स्वतन्त्रता दिवसको अवसरमा आयोजित सर छोग्याल टाशी नामग्याल स्मृति कप २०२६ अन्तर्गत पाँचौँ तथा अन्तिम क्वार्टरफाइनल खेलमा आज थन्डरबोल्ट नर्थ युनाइटेडले सिक्किम पुलिस फुटबल टोलीलाई पराजित गर्दै सेमिफाइनलमा स्थान सुनिश्चित गरेको छ।यहाँको पाल्जोर स्टेडियममा आज सम्पन्न रोमाञ्चक खेलमा थन्डरबोल्ट नर्थ युनाइटेडले २-१ गोल अन्तरले सिक्किम पुलिस फुटबल टोलीलाई पराजित गरेको हो। खेलको १८औँ मिनेटमा आयुष घलेनले गोल गर्दै थन्डरबोल्ट नर्थ युनाइटेडलाई अग्रता दिलाए। त्यसको केही समयपछि २३औँ मिनेटमा सुराग छेत्रीले सिक्किम पुलिसका लागि गोल गर्दै खेललाई १-१ को बराबरीमा ल्याए।तर, आयुष घलेनले नै २६औँ मिनेटमा व्यक्तिगत दोस्रो गोल गर्दै थन्डरबोल्ट नर्थ युनाइटेडलाई पुनः अग्रता दिलाए। त्यसपछि दुवै टोलीले गोलका लागि निरन्तर प्रयास गरे पनि थप गोल हुन नसक्दा थन्डरबोल्ट नर्थ युनाइटेड २-१ ले विजयी बन्यो।उत्कृष्ट प्रदर्शन गर्दै टोलीका लागि दुई गोल गरेका आयुष घलेनलाई म्यान अफ द म्याच घोषित गरियो। उनको दुई गोल क्वार्टरफाइनल खेलमा थन्डरबोल्ट नर्थ युनाइटेडको जितका लागि निर्णायक साबित भयो।उक्त खेलमा सिक्किम विधानसभाका सचिव लालित गुरुङ प्रमुख अतिथिका रूपमा उपस्थित थिए।
