आईटीएसले मङ्गसारीमा चलिरहेको मङ्गरजुङ्ग परियोजनाको विकासको समीक्षा गर्न स्थलगत भ्रमण गर्‍यो

सोरेङ, 27 अगस्त। इन्स्टिच्युट फर् ट्रान्सफर्मिङ सिक्किम (आईटीएस) ले आज मङ्गसारीमा चलिरहेको मङ्गरजुङ्ग परियोजनाको विकासको समीक्षा गर्न स्थलगत भ्रमण गर्‍यो। आईटीएस टोलीले पर्यटन तथा नागरिक उड्डयन विभाग र अल सिक्किम मङ्गर संघका अधिकारीहरूसँग अन्तरक्रिया गर्‍यो र निर्माण स्थलको वर्तमान स्थितिको निरीक्षण गर्‍यो।
टोलीले राम्रोसँग योजनाबद्ध पूर्वाधारको आवश्यकतामा जोड दियो र पर्याप्त पार्किङ सुविधाको सिर्जना, व्यवस्थित भूमि अधिग्रहण, र पर्यटन तथा नागरिक उड्डयन विभागद्वारा उचित दस्तावेजीकरण रेकर्ड कायम राख्ने जस्ता विशिष्ट उपायहरू सुझाउहरू दियो। टोलीले परियोजनाको दिगोपन सुनिश्चित गर्नको लागि सम्बन्धित विभागले राजस्व उत्पन्न गर्ने संयन्त्र सुनिश्चित गर्नुपर्नेमा जोड दियो। उनीहरूले थप समीक्षा र अनुगमनको लागि चाँडोभन्दा चाँडो आईटीएसमा विस्तृत परियोजना प्रतिवेदन पेश गर्न पनि निर्देशन दिए।
पर्यटन तथा नागरिक उड्डयन विभागकी मुख्य अभियन्ता शान्ति तामाङले आईटीएस टोलीलाई विस्तृत जानकारी प्रस्तुत गरिन्। उनले मङ्गरजुङ्ग स्थलको ऐतिहासिक र सांस्कृतिक महत्वमाथि प्रकाश पार्दै यसको घरेलू तथा अन्तरराष्ट्रिय पर्यटकहरूका लागि प्रमुख आकर्षणको रूपमा देखा पर्ने सम्भावनालाई जोड दिइन्। उनले टोलीलाई परियोजनाको वित्तीय पक्ष, हालसम्म हासिल भएको प्रगति र पूर्वाधार विकासको सन्दर्भमा सामना गर्नुपर्ने चुनौतीहरूको बारेमा पनि जानकारी गराइन्।
आईटीएसले गुणस्तर मापदण्ड कायम राख्दै परियोजना समयमै सम्पन्न गर्न पूर्ण सहयोग र निरन्तर अनुगमनको आश्वासन दिएको बताइएको छ। भ्रमण अवधि आईटीएसका उपाध्यक्ष सीपी शर्मा, आईटीएसका सदस्य गंगादेवी प्रधान, नम्रता थापा, डा. साङ्गे दोर्जी भोटिया, डा. भरतचन्द्र बसिष्ठ, जेम्स सारिङ लेप्चा र डा. नीरज अधिकारी, सिक्किम कृषि तथा बागवानी बोर्डका अध्यक्ष सीके राणा आदि उपस्थित थिए।