खारी खानीमा भएको वाहन दुर्घटनामा नवजात शिशुको मृत्यु, गम्भीर घाइतेहरू सिलगढी रेफर

गान्तोक, 05 अगस्त। सोरेङ जिल्लाको नयॉं बजार पुलिस थाना क्षेत्र अन्तर्गत खारी खानी, बुदाङमा 4 अगस्त, 2025 का दिन भएको वाहन दुर्घटनामा घाइते भएका एक वर्षीय नवजात शिशुको निधन भएको छ। दुर्घटनामा गम्भीर रूपमा घाइते भएका अन्य तीन जनालाई सिलगढीको स्थानीय एउटा निजी अस्पतालमा रेफर गरिएको छ।
हिजो, सोमवार एनटीपीसी छेउ खारी खानी, बुदाङमा एउटा वाहन दुर्घटनामा परेर सडकदेखि लगभग 300 फिट तल नदी किनारमा पुगेको थियो। वाहनमा चार जना यात्रा गरिरहेका थिए, जसमा दुई जना नाबालिग पनि थिए। वाहन चालकले कथित नियन्त्रण गुमाएपछि वाहन सडकदेखि तल झरेको कुरा पुलिस रिपोर्टमा उल्लेख छ।
दुर्घटनापछि, स्थानीय मानिसहरू र एनटीपीसी कर्मीहरूको सहयोगमा घाइते व्यक्तिहरूलाई उद्धार गरियो र जोरथाङ सीएचसीमा लगियो। जोरथाङ सीएचसीबाट घाइतेहरूलाई नाम्ची जिल्ला अस्पताल रेफर गरियो। दुर्भाग्यवश एक वर्षीय नवजात शिशुको उपचारको क्रममा मृत्यु भयो। दुर्घटनामा घाइते बनेका अन्य तीन जनाको स्थिति पनि गम्भीर रहेकाले थप उपचारको लागि उनीहरूलाई सिलगढी रेफर गरिएको छ।
मृतक शिशु पाकिम जिल्लाको लामातेन, रंगेली निवासी थिए। घाइतेहरू तीनै जना सोरेङ जिल्ला निवासी बताइएको छ। नवजातको शव पोस्टमार्टमपछि अभिभावकहरूलाई सुम्पएको छ।