सीएपी सिक्किम जनजाति मामिला परिषदको समन्वय सभा सम्पन्न

गान्तोक, 23 फरवरी । सिटिजन एक्सन पार्टी (सीएपी) सिक्किम को जनजाति मामिला परिषदको समन्वय सभा आज जोरथाङस्थित पार्टी कार्यालयमा पार्टीका जनजाति मामिला वरिष्ठ उपाध्यक्ष ओङ्देन छिरिङ लेप्चाको अध्यक्षतामा सम्पन्न भयो। सभामा राज्यका जनजाति समुदायहरूका समस्या, ग्लोफ (जीएलओएफ) का कारण उत्तर सिक्किमका जनसाधारणले झेल्नु परिरहेका कठिनाइहरू लगायत जनजाति मामिला परिषदको हालसम्मका गतिविधिमाथि चर्चा भएको बताइएको छ।
आफ्नो अध्यक्षीय सम्बोधनका क्रममा ओङ्देन छिरिङ लेप्चाले राज्यको वर्तमान अवस्थामाथि प्रकाश पार्दै जनजाति मात्र नभई समग्र राज्यवासी तथा राज्यको समग्र उत्थानका निम्ति सीएपी सिक्किमको स्थापना भएको बताए। पार्टीले स्पष्ट, दीर्घकालीन तथा प्रभावकारी कार्यक्रम तयार गरिसकेको उल्लेख गर्दै उनले जातिको नाममा फैलाइने नकारात्मक तत्वहरूको कडा विरोध गर्ने बताए।
उनले सरकार इमानदार भएको भए केन्द्रबाट जनजातिहरूको स्वास्थ्य, शिक्षा तथा आर्थिक उन्नतिका लागि आवण्टित रकम फिर्ता नहुने दाबी गरे। उनले वर्तमान राज्य सरकार क्षमताविहीन रहेको कुरा जनतामाझ प्रष्ट भइसकेको आरोप लगाउॅंदै लिम्बू–तामाङ समुदायविरुद्ध दिएको विवादास्पद अभिव्यक्ति असमका भास्कर ढकालले फिर्ता लिनुपर्ने माग गरे। यस विषयमा राज्य सरकारको मौनताले विभिन्न शंका उत्पन्न गरेको पनि उनले बताए।