गान्तोक, 10 अगस्त। ८०औँ स्वतन्त्रता दिवस छोग्याल सर टाशी नामग्याल मेमोरियल कप २०२६ अन्तर्गत सोमबार यहाँको पाल्जोर स्टेडियममा सम्पन्न चौथो खेलमा सशस्त्र सीमा बल (एसएसबी) ले सिक्किम आक्रमण एससीलाई २-१ गोलले पराजित गरेको छ।सिक्किम फुटबल एसोसिएसन (एसएफए) द्वारा सिक्किम सरकारको गृह विभागको तत्वावधानमा आयोजित प्रतियोगिताको उक्त खेलमा शुरुदेखि नै दुवै टोलीबीच कडा प्रतिस्पर्धा देखियो। खेलको १३औँ मिनेटमा एसएसबीका द्विमालु ब्रह्माले गोल गर्दै टोलीलाई १-० को अग्रता दिलाए। तर, सिक्किम आक्रमण एससीले लामो समय कुर्नुपरेन र खेलको १८औँ मिनेटमा सागर गुरुङले गोल गर्दै खेललाई १-१ को बराबरीमा ल्याए।बराबरीपछि दुवै टोलीले अग्रता लिन निरन्तर आक्रमण गरे। दोस्रो हाफमा पनि दुवै टोलीले उत्कृष्ट प्रदर्शन गरे पनि निर्धारित समयको अन्तिम चरणसम्म खेल बराबरीमै रह्यो।खेलको ८३औँ मिनेटमा एसएसबीका एल. हाओकिपले निर्णायक गोल गर्दै टोलीलाई २-१ को अग्रता दिलाए। त्यसपछि सिक्किम आक्रमण एससीले बराबरी गोलका लागि प्रयास गरे पनि सफल हुन नसकेपछि एसएसबीले २-१ को जित दर्ता गर्यो।खेलमा सिक्किम फुटबल एसोसिएसनका अध्यक्ष मेन्ला एथेनपासहित एसएफएका कार्यकारी सदस्यहरूको उपस्थिति रहेको थियो। कार्यक्रममा एसएसबी गान्तोकका डीआईजी हेमचन्द्र विशिष्ट अतिथिका रूपमा उपस्थित थिए।
