भाजपा सिक्किमद्वारा एसजीएवाई पुनः प्रमाणीकरणमा आधिकारिक कारबाहीको माग

गान्तोक, 29 जनवरी। भारतीय जनता पार्टी (भाजपा) सिक्किम एकाइले सिक्किम गरीब आवास योजना (एसजीएवाई) अन्तर्गत आवण्टन आदेशहरूको पुनः प्रमाणीकरण सम्बन्धी प्रतिबद्धतामा तत्काल स्पष्टता र लिखित पुष्टि माग गरेको छ। पार्टी प्रवक्ता साङ्गे ग्याछो भोटियाको नेतृत्वमा आज एक प्रतिनिधि टोलीले ग्रामीण विकास विभागको भ्रमण गरेर यस्तो माग गरेको छ।ग्रामीण विकास विभागका अधिकारीहरूसँग आज भएको भेट भाजपा सिक्किम एकाइले 5 र 10 दिसम्बर, २०२५ मा गरेको बैठकको फलो–अप रहेको प्रेस विज्ञप्तिमा उल्लेख छ। प्रवक्ता भोटियाले दिसम्बर २०२५ मा भएको उच्चस्तरीय छलफलहरूमा मुख्यमन्त्रीको हस्तक्षेपको आश्वासन दिइए पनि आवास एकाइहरूको योग्यता आधारित आवण्टन सुनिश्चित गर्न हालसम्म कुनै ठोस प्रगति नदेखिएकोमा चिन्ता व्यक्त गरेकका छन्।यस भेटका क्रममा पार्टीले विभागीय आश्वासनका बाबजुद पनि आवण्टन आदेशहरूको अडिट सुरु गर्न कुनै आधिकारिक कदम नचालिएको, औपचारिक परिपत्र वा सार्वजनिक सूचनाको अभावमा धेरै योग्य लाभार्थीहरू अन्योलमा परेको तथा विभाग र भाजपाबीच भएको सहमति अनुसार विभागमा पेश गरिएको समस्याको औपचारिक पुष्टि अझै प्राप्त नभएको विषय उठाएको छ। भाजपा सिक्किमले अघिल्ला छलफलहरूमा योजनाबाट छुटेका तर योग्य नागरिकहरूलाई पुनः विचार गरिनेछ भन्ने सहमतिमा पार्टी अडिग रहेको बताएको छ। भाजपाले विभागबाट स्पष्ट कार्ययोजना र लिखित निर्देशनको माग गरेको छ। भाधजपाले एसजीएवाई जस्ता जनकल्याणकारी योजनाहरू राजनीतिक पक्षपातभन्दा माथि हुनुपर्छ भनेको छ। भाजपा सिक्किमले कुनै पनि योग्य नागरिक सम्मानजनक आवासको अधिकारबाट वञ्चित नहोस् भन्ने सुनिश्चित गर्न नजिकबाट निगरानी जारी राख्ने प्रतिबद्धता व्यक्त गरेको छ।