युक्सममा २१ देखि २८ अगस्तसम्म भव्य रूपमा पाङ ल्हाब्सोल पर्व मनाइने

गेजिङ, 01 अगस्त । सिक्किमको प्राचीन राजधानी युक्सममा आगामी २१ देखि २८ अगस्तसम्म राज्यको समृद्ध धार्मिक, सांस्कृतिक तथा आध्यात्मिक सम्पदालाई समर्पित वार्षिक पाङ ल्हाब्सोल पर्व भव्य रूपमा आयोजना गरिने भएको छ।यो पर्व पाङ ल्हाब्सोल समारोह समिति, युक्समले पर्यटन तथा नागरिक उड्डयन मन्त्री छिरिङ टी. भोटियाको मार्गदर्शनमा आयोजना गर्न लागेको हो। मन्त्री भोटिया यस वर्षको पाङ ल्हाब्सोल समारोह समिति का प्रमुख संरक्षक पनि हुन्।पर्वको तयारीस्वरूप बुधबार आयोजक समितिले तयारी बैठक आयोजना गर्यो। त्यसपछि नोर्बुगाङ, युक्समस्थित पर्वस्थलको संयुक्त निरीक्षण गरी आठदिने कार्यक्रमका लागि भइरहेको तयारीको समीक्षा गरिएको समारोह समितिले आज प्रेस विज्ञप्तिमा जनाएको छ।पाङ ल्हाब्सोल सिक्किमको सबैभन्दा पूजनीय पर्वहरूमध्ये एक हो। यस पर्वमा कञ्चनजङ्घा हिमाललाई सिक्किमको संरक्षक देवताको रूपमा प्रतिष्ठापित गरिएको ऐतिहासिक क्षणको स्मरण गरिन्छ। हरेक वर्ष मनाइने यस पर्वले सिक्किमवासी र कञ्चनजङ्घाबीचको आध्यात्मिक सम्बन्धलाई झल्काउँछ। यस अवसरमा पवित्र हिमालप्रति श्रद्धा व्यक्त गर्दै विशेष पूजा तथा परम्परागत धार्मिक अनुष्ठान सम्पन्न गरिन्छ।आठदिने कार्यक्रममा सिक्किमको समृद्ध परम्परा र सांस्कृतिक सम्पदालाई उजागर गर्ने विभिन्न धार्मिक, आध्यात्मिक तथा सांस्कृतिक कार्यक्रमहरू आयोजना गरिनेछन्। यस वर्षको विशेष आकर्षणका रूपमा कञ्चनजङ्घा मोटरसाइकल क्लबले 21 अगस्तमा पेमायाङ्त्से, पेलिङदेखि युक्समसम्म वार्षिक पाङ ल्हाब्सोल राइड आयोजना गर्नेछ। त्यसैगरी, युक्सम पर्यटन विकास समितिले युनेस्को विश्व सम्पदा सूचीमा सूचीकृत कञ्चनजङ्घा राष्ट्रिय निकुञ्ज हुँदै जोङ्ग्रीसम्म तथा त्यहाँबाट पवित्र दूध पोखरी पुग्ने धार्मिक पदयात्रा आयोजना गर्नेछ। यस पदयात्राका लागि इच्छुक सबै सहभागीहरूका लागि दर्ता खुला गरिएको छ।मुख्य पर्व 28 अगस्तका दिन पेमायाङ्त्से गुम्बाका भिक्षुहरू तथा स्थानीय श्रद्धालुहरूले जोङ्ग्रीमा विशेष पूजा गर्नेछन् भने युक्समको नोर्बुगाङमा पनि एकैसाथ धार्मिक अनुष्ठान सञ्चालन हुनेछ।