गान्तोक, 26 नोभेम्बर । सिक्किम अकादेमीले वार्षिक रूपमा प्रदान गर्ने सिक्किम अकादेमी पुरस्कार नाम्ची जिल्लाको राभाङला महकुमा अन्तर्गत लवर देथाङ निवासी ५५ वर्षिय भरत राईलाई अर्पण गरिने सिक्किम अकादेमीले पत्रकार सम्मेलनमा घोषणा गरेको छ।
सिक्किम अकादेमीका अध्यक्ष एसआर सुब्बाले यसको घोषणा गर्दै पुरस्कारमा नगद राशि १ लाख ५ हजार रुपियाँ, ताम्रपत्र प्रसस्ति पत्र र अङ्ग वस्त्र अर्पण गरिने बताए। उनले भने, सिक्किम अकादेमीले हाम्रो मौलिकता हाम्रो हाम्रो अस्तित्व धारणालाई लिएर कार्य गरिरहेको हुनाले लोपोन्मुख अवस्थामा रहेको बाँसको परम्परागत शिल्पकारहरूलाई प्रोत्साहन गर्ने तथा युवा पुस्तालाई यसबारेमा प्रशिक्षित गर्ने बारेमा पनि सोच राखेको बताए।
अकादेमीका महासचिव पूर्ण योञ्जनले आगामी ८ दिसम्बरको दिन सम्मान भवनमा मुख्यमन्त्री प्रेमसिंह तामाङको बाहुलीबाट पुरस्कार अर्पण गरिने जानकारी दिए। यसैगरी, परम्परागत बाँस शिल्पकारहरू खोज्ने क्रममा पश्चिम र दक्षिण सिक्किमका विभिन्न ठाउँमा पुग्दा पाँचजना शिल्पकार भेटिएको र सबैको आर्थिक अवस्था कमजोर भएको पाइएको उनले बताए।
सिक्किम अकादेमीले विजेता बाहेक अन्य चारजनालाई पनि सान्तवना पुरस्कार अर्पण गर्ने बताए, जसमा दश हजार रुपियाँ र सम्मान पत्र प्रदान सामेल रहने घोषणा गरिएको छ। यसका अतिरिक्त शिल्पकारहरूलाई लिएर युवाहरूको निम्ति प्रशिक्षण कार्यक्रम सञ्चालन गरिने सिक्किम अकादेमीले सोचेको उनले बताए।
यस पटकको सिक्किम अकादेमी पुरस्कार चयनको निम्ति तीन सदस्यीय निर्णायकहरुले पाँचवटा गाउँमा रहेका शिल्पकारहरूको काम सिप हेरेर चयनित गरेको बताए। खाममा बन्द विजेताको नाम पत्रकार प्रवीण खालिङको हातबाट खोलेर घोषणा गरिएको थियो।
