‘सिक्किम सिङ्गिङ स्टार, सिजन- 1’ को घोषणा, सबै नेपाली भाषीहरूले भाग लिने सक्ने

गान्तोक, 02 अगस्त । सिक्किमका युवा कलाकारहरूले सामुहिक रूपमा एउटा गायन रियालिटी शो ‘सिक्किम सिङ्गिङ स्टार, सिजन- 1’ आयोजना गर्ने भएका छन्। यो प्रतियोगिता सिक्किमलगायत देशका अन्य राज्यहरूमा बसोबास गर्ने नेपाली भाषी समुदायका लागि पनि खुल्ला रहनेछ। प्रतियोगितामा भाग लिनका लागि अनलाइन साथै भौतिक रूपमा उपस्थित भएर अडिशन दिन सक्नेछन्।
उक्त जानकारी आयोजकका पक्षमा मेरो भोइस युनिभर्सका विजेता प्रितम राईले आज राजधानीको प्रेस क्लब अफ् सिक्किममा आयोजित एक पत्रकार सम्मेलनमा दिए। उनले सिक्किमका कलाकारहरूले एक टिम बनेर गायन प्रतियोगिता ‘सिक्किम सिङ्गिङ स्टार’ आयोजना गर्ने निर्णय लिएको बताए। उनले यस गायन प्रतियोगितामा कुनै प्रकारका प्रतिबन्धहरू नरहने र सिक्किमलगायत देशको कुनै पनि राज्यका इच्छुक नेपाली भाषीहरूले भाग लिन सक्ने जानकारी गराए।
गायक प्रितम राईले प्रतियोगिता आयोजन गर्नुको औचित्यमाथि प्रकाश पार्दै सिक्किममा पहिले पनि धेरै गायन प्रतियोगिताहरू आयोजना गरिएको र धेरै राम्रा कलाकारहरूलाई जन्माएको बताए। उनले यो प्रतियोगिता कसैको विरोध अथवा आह्रिसमा नभई नि:स्वार्थ भावका साथ नेपाली गीत-सङ्गीतको क्षेत्रलाई अगाडी बढाउने उद्देश्यले गरिरहेको स्पष्ट पारे। उनले आफुहरू पनि कलाकार भएको नातामा सिक्किमलाई सङ्गीतको क्षेत्रमा अगाडी बढाउने आफ्नो दायित्व निर्वाह गर्न चाहेको बताए।
उनले सिक्किमका वरिष्ठ कलाकारहरूले युवा पुस्तालाई डोऱ्याएर यहॉंसम्म ल्याए भने अब युवा पुस्ताले पनि भावी पुस्तालाई मार्गदर्शन गर्नुपर्ने दायित्व रहेको बताए। उनले वर्तमानमा युवाहरू केवल सरकारी नौकरीको प​छाडी परेका छन् भन्दै गीत-सङ्गीतको क्षेत्रमा पनि धेरै अवसर र सम्भावनाहरू छन् भन्ने बताउन यो प्रतियोगिता गरिरहेको बताए। उनले यो प्रतियोगितालाई छुट्टै प्रकारले आयोजना गर्ने ​सोच रहेको अवगत गराउॅंदै विजेताका लागि एउटा अन्तरराष्ट्रिय स्तरको कार्यक्रम आयोजना गर्ने योजना रहेको बताए।
यसैगरी, युवा गायक रिवास गुरुङले यस प्रतियोगितामा भाग लिनका लागि अनलाइन पञ्जीकरण शुरू भइसकेको बताए। उनले अनलाइन पञ्जीकरण आगामी 25 अगस्तसम्म जारी रहने बताए भने इच्छुक व्यक्तिहरूले भौतिक रूपमा उपस्थित भएर पनि अडिशन दिन सक्ने बताए। उनले नेपाली गीत सङ्गीतलाई माया गर्ने सबैलाई भाग लिन अपील गरे।
गायक राईले आगामी दिनहरूमा सिक्किमका छवटै जिल्ला लगायत दार्जिलिङ, कालेबुङ र सिलगढी पनि अडिशन राखिने जानकारी गराए। पत्रकार सम्मेलन कलाकार प्रकाश बस्नेत लगायत अन्यहरू पनि उपस्थित थिए।