सीएपी प्रेस एवं प्रचार परिषद् र आईटीसी परिषदको समन्वय बैठक सम्पन्न

गान्तोक, 30 अगस्त। सिटिजन एक्सन पार्टी (सीएपी) सिक्किमको प्रेस एवं प्रचार परिषद् र आईटीसी परिषदको एक समन्वय बैठक आज आईबीएम रम्फूस्थित सर्कल कार्यालयमा सम्पन्न भयो। पार्टीकी उपाध्यक्ष सुमति छेत्रीले अध्यक्षता गरेको बैठकमा वरिष्ठ पार्टी नेतृत्वहरू प्रशान्त बाबु छेत्री, कौशल लोहागण, दिपेन्द्र राई, सीएम मिश्र, प्रकाश पराजुली, अल्बर्ट गुरुङ, एचएम राई, जिग्मी डी. भोटिया आदि उपस्थित थिए।
बैठकमा प्रेस र मिडिया पहुँचलाई सुदृढ पार्ने सम्बन्धमा विस्तृत मुद्दाहरूमाथि चर्चा थिए, जहाँ सहभागीहरूले चुनौती र अवसरहरूमा रचनात्मक दृष्टिकोण साझा गरेका थिए। सहभागीहरूले पार्टीको दृष्टिकोणलाई अगाडि बढाउन र सिक्किमका जनतासँग अर्थपूर्ण रूपमा जोडिन प्रभावकारी सञ्चारको महत्त्वपूर्ण भूमिकामा जोड दिएका थिए। बैठकले पार्टीको सन्देशलाई अझ व्यवस्थित, प्रभावकारी र पारदर्शी रूपमा आम जनतामा पुर्‍याउन परिषद्हरूलाई थप सशक्त बनाउने र समन्वय बढाउने सर्वसम्मतिले निर्णय गरेको बताइएको छ।
बैठकमा दुई जना नयॉं सदस्य सुकराज शिलाल र रोजेश राई सीएपीमा सामेल भएको दाबी गरिएको छ। सोरेङ जिल्लाका आईटीसी परिषद् अध्यक्ष निश्चिल लोहागणद्वारा आज जारी प्रेस विज्ञप्तिमा भनिएको छ, सीएपी सिक्किम जनताको आवाजलाई सशक्त बनाउने आफ्नो प्रतिबद्धतामा अडिग छ। हाम्रो प्रेस तथा प्रचार र आईटीसी परिषदहरूलाई सुदृढ पारेर, हामी आशा, जवाफदेहिता र जनता-प्रथम शासनको सन्देशलाई प्रत्येक घरपरिवारमा पुर्‍याउन कटिबद्ध छौं।