प्रोफेसर ज्योति प्रकाश तामाङको निधनमा राज्यपाल, मुख्यमन्त्री तथा अन्यहरूद्वारा दु:ख प्रकट

गान्तोक, 29 अप्रेल। सिक्किम केन्द्रिय विश्वविद्यालयका कार्यवाहक उपकुलपति डा. ज्योति प्रकाश तामाङको निधन भएको छ। 63 वर्षीय डा. तामाङको आज बिहान सिलगढ़ीमा निधन भएको बताइएको छ। सिक्किमका राज्यपाल, मुख्यमन्त्री तथा विभिन्न राजनीतिक दलका नेताहरू प्रोफेसर तामाङको निधनमा दु:ख प्रकट गर्दै शोक सन्तप्त परिवारमा हार्दिक समवेदना व्यक्त गरेका छन्।
सिक्किमका राज्यपाल ओम प्रकाश माथुरले सिक्किम केन्द्रिय विश्वविद्यालयका कार्यकारी कुलपति प्रोफेसर ज्योति प्रकाश तामाङको निधनमा शोक प्रकट गरेका छन्। राज्यपालले आफ्नो शोक सन्देशमा सिक्किम केन्द्रिय विश्वविद्यालयका कार्यकारी कुलपति प्रोफेसर ज्योति प्रकाश तामाङको निधनको खबर अत्यन्त दुखद रहेको बताएका छन्।
मुख्यमन्त्री प्रेमसिंह तामाङले पनि डा. ज्योति प्रकाश तामाङको असामयिक निधनमा गहिरो दु:ख व्यक्त गरेका छन्। उनले आफ्नो शोक सन्देशमा अनुसन्धान र शैक्षिक उत्कृष्टतामा उनको बहुमूल्य योगदानले सिक्किम विश्वविद्यालय र शैक्षिक समुदायमा अमिट छाप छोडेको बताएका छन्।
यसरी नै सिक्किम डेमोक्रेटिक फ्रण्ट पार्टीका अध्यक्ष पवन चामलिङले सिक्किम विश्वविद्यालयका कार्यवाहक उपकुलपति तथा खाद्य सूक्ष्मजीव विज्ञानको क्षेत्रका एक प्रसिद्ध व्यक्तित्व डा. ज्योति प्रकाश तामाङको निधनको खबरले अत्यन्तै दुःखी बनाएको बताएका छन्। उनले डा. तामाङको निधन विश्वविद्यालयको लागि मात्र नभई सम्पूर्ण राज्यको लागि ठूलो क्षति बताएका छन्।
सिटिजन एक्सन पार्टी, सिक्किमका अध्यक्ष गणेश राईले सिक्किम विश्वविद्यालयका कार्यवाहक उपकुलपति डा. ज्योति प्रकाश तामाङको असामयिक निधनको खबरले आफू स्तब्ध अनि दु:खी बनेको बताएका छन्। उनले डा. तामाङको निधन सिक्किम र सम्पूर्ण पूर्वोत्तरकै लागि एउटा अपूरणीय क्षति बताएका छन्।