भाषा मान्यता दिवसमा मुख्यमन्त्री प्रेमसिंह तामाङलाई ‘राज्य रत्न’ ले सम्मानित गरिने

गान्तोक, 01 अगस्त। नेपाली साहित्य परिषद सिक्किमले मुख्यमन्त्री प्रेमसिंह तामाङलाई ‘राज्य रत्न’ ले सम्मानित गर्ने घोषणा गरेको छ। आगामी 20 अगस्त 34औं भाषा मान्यता दिवसको अवसरमा परिषदले मुख्यमन्त्रीलाई ‘राज्य रत्न’ ले सम्मानित गर्नेछ। परिषदका ​अध्यक्ष हरि ढुङ्गेलले आज राजधानीको विकास क्षेत्रस्थित परिषद भवनमा आयोजित एक पत्रकार सम्मेलनमा उक्त घोषणा गरे।
अध्यक्ष ढुङ्गेलले नेसाप सिक्किमलाई मुख्यमन्त्री प्रेमसिंह तामाङले धेरै कुराहरूमा टेवा दिने काम गरिरहेको बताए। मुख्यमन्त्रीले 20 अगस्तलाई सरकारी छुट्टी घोषणा गरिदिएपछि यो महोत्सव मनाउन छुट्टी पाइरहेको उनले बताए। यसरी नै गत वर्षदेखि सरकारी अधिसूचनाहरू अङ्ग्रेजी भाषाका साथै नेपाली भाषामा पनि जारी गरिने मुख्यमन्त्रीले घोषणा गरिसकेको उनले अवगत गराए। यस कारण नेसाप सिक्किमले यसपाली मुख्यमन्त्रीलाई ‘राज्य रत्न’ ले सम्मानित गर्ने निर्णय लिएको उनले जानकारी गराए।
यसैगरी, अध्यक्ष ढुङ्गेलले भाषा मान्यता दिवसको अवसरमा डुवर्स- बाग्राकोट निवासी अमिर सुन्दासलाई ‘कञ्चनजङ्घा कृष्ण स्मृति पुरस्कार’ ले सम्मानित गरिने जानकारी गराए। उक्त पुरस्कार चित्रकार/मूर्तिकारलाई प्रदान गरिॅंदै आएको उनले जनाए। यसरी नै सिक्किम विश्वविद्यालयमा नेपाली विषयमा सर्वाधिक अङ्क ल्याउने एक विद्यार्थीलाई ‘प्रेमलाल स्मृति पुरस्कार’ ले पुरस्कृत गरिने उनले जानकारी गराए।
यस अतिरिक्त, अध्यक्ष ढुङ्गेलले भानु जयन्तीका दिन प्रदान गरिने भानु पुरस्कारलगायत सेवा श्री सम्मान र भाषा गौरव सम्मानहरू पनि यसै भाषा मान्यता दिवसको अवसरमा प्रदान गरिने बताए। उनले सिक्किमका एक वरिष्ठ साहित्यकार पद्मश्रीले सम्मानित सानु लामाको निधनका कारण उक्त पुरस्कार समारोह स्थगित गरिएको थियो भनी जानकारी गराए।