सांसद सुब्बाले दुर्गादास उइकेसॅंग जनजाति र लिम्बू तामाङको सीट आरक्षणबारे चर्चा गरे

गान्तोक, 08 अगस्त। सिक्किमका लोकसभा सांसद डा. इन्द्रहाङ सुब्बाले आज केन्द्रिय जनजाति मामिला राज्यमन्त्री दुर्गादास उइकेसॅंग भेट गरे। यस भेटको क्रममा सांसद सुब्बाले छुटेका समुदायहरूलाई अनुसूचित जनजातिको सूचीमा सामेल गर्न लामो समयदेखि चलिरहेको मागको बारेमा अवगत गराए। उनले भारतको रजिस्ट्रार जनरलको कार्यालयद्वारा तोकिएका मापदण्डहरू पूरा गर्न सिक्किम सरकारले गरिरहेको इमान्दार प्रयासहरूमाथि प्रकाश पारे।
यसैगरी, सांसद सुब्बाले 2003 मा अनुसूचित जनजातिको मान्यता पाएर पनि आजसम्म आफ्नो संवैधानिक अधिकारबाट वञ्चित बनेका लिम्बू र तामाङ जनजाति समुदायको मुद्दाप्रति पनि मन्त्रीको ध्यानाकर्षण गराए। उनले यी लामो समयदेखि लम्बित मुद्दाहरूलाई सम्बोधन गर्न केन्द्रिय राज्यमन्त्रीको बहुमूल्य मार्गदर्शन र सहयोगको आश्वासनको लागि कृतज्ञता व्यक्त गरे।