मङ्गन जिल्लामा सीएपी सिक्किमको जिल्ला कार्यकारिणी परिषद् बैठक सम्पन्न

गान्तोक, २९ सेप्टेम्बर। सिटिजन एक्सन पार्टी (सीएपी) सिक्किमको मङ्गन जिल्ला कार्यकारिणी परिषद्को बैठक आज पार्टी अध्यक्ष गणेश के. राईको अध्यक्षतामा सम्पन्न भयो। बैठकमा पार्टी संगठनलाई तल्लो तहसम्म सुदृढ बनाउने, सदस्यता विस्तार गर्ने, निर्वाचन क्षेत्रस्तरीय समन्वयलाई प्रभावकारी बनाउने तथा मङ्गन जिल्लासँग सम्बन्धित विभिन्न महत्वपूर्ण विषयहरूमा विस्तृत छलफल गरियो।
बैठकलाई सम्बोधन गर्दै पार्टी अध्यक्ष राईले उत्तर सिक्किमलगायत राज्यका विभिन्न क्षेत्रमा रहेका सडकको अवस्थाबारे चर्चा गर्दै कमजोर सडक तथा यातायात सम्पर्कका कारण जनताले भोग्नुपरेका कठिनाइहरूबारे ध्यानाकर्षण गराए। विशेषगरी विद्यार्थी तथा परीक्षा लगायत आवश्यक कामका लागि यात्रा गर्नुपर्ने नागरिकहरूले सडकको अवस्थाका कारण लामो समय यात्रा गर्नुपर्ने अवस्थाबारे पनि उनले चर्चा गरे।
पार्टी अध्यक्षले उत्तर सिक्किमका विभिन्न क्षेत्रहरूमा पैह्रो तथा अन्य प्राकृतिक जोखिमका सम्भावित क्षेत्रहरूबारे पनि चर्चा गर्दै सडक पूर्वाधार, आपदा प्रबन्धन तथा जोखिममा रहेका समुदायको सुरक्षामा थप ध्यान दिनुपर्ने आवश्यकता औँल्याए।
उनले पार्टीको प्राथमिकता तल्लो तहदेखि संगठनलाई सुदृढ बनाउने, सदस्यता विस्तार गर्ने तथा जनतासँग निरन्तर सम्पर्क र समन्वय कायम राख्ने हुनुपर्ने बताए। उनले पार्टीका पदाधिकारी तथा कार्यकर्ताहरू स्थानीय समुदायसँग निरन्तर सम्पर्कमा रहनुपर्ने र जनताले भोगिरहेका समस्याहरूलाई व्यवस्थित रूपमा रेकर्ड गरी सम्बन्धित निकाय तथा उचित मञ्चमा उठाउनुपर्नेमा पनि जोड दिए।
मङ्गन जिल्ला ट्राइबल काउन्सिलका अध्यक्ष डीआर लिम्बूले पार्टीका पाँच प्रमुख उद्देश्यहरूबारे चर्चा गर्दै निर्वाचन क्षेत्रस्तरीय जानकारी प्रस्तुत गरे। उनले उत्तर सिक्किमको टिस्टा बेसिन तथा टिस्टा III परियोजनासँग सम्बन्धित विषयहरूबारे पनि चर्चा गर्दै सदस्यता विस्तार र संगठनलाई थप सुदृढ बनाउनुपर्ने आवश्यकतामा जोड दिनुभयो।
यसैगरी, उपाध्यक्ष (प्रभारी) तथा मङ्गन जिल्ला अध्यक्ष
जोर्बु छेङ लेप्चाले संगठनलाई निरन्तर सुदृढ बनाउने, व्यापक सदस्यता अभियान सञ्चालन गर्ने तथा पार्टीका विभिन्न संगठनात्मक निकायहरूको नियमित बैठक गर्नुपर्नेमा जोड दिए। उनले एसीईसीलगायत अन्य संगठनात्मक निकायहरूको मासिक बैठक अनिवार्य रूपमा सञ्चालन गर्नुपर्ने तथा पार्टीका गतिविधिका लागि समर्पित पूर्णकालीन कार्यकर्ताहरूको विकास गर्नुपर्ने आवश्यकता औँल्याए।