पाकिममा 321औं तेयोङसी श्रीजङ्गा सावन तोङनाम 2025 पालन गरियो

पाकिम, 4 दिसम्बर । सिक्किम सरकारको सामाजिक कल्याण विभाग तथा महिला, बालबालिका, वरिष्ठ नागरिक एवं दिव्याङ्गजन कल्याण विभागकी सल्लाहार एवं विधायक पामिन लेप्चा आज पाकिम जिल्लाको नर्थ कार्थोक, याक्तेनमा पालन गरिएको 321औं तेयोङसी श्रीजङ्गा सावन तोङनाम 2025 र श्रीजङ्गा युमा साम माङहिमको उद्घाटन समारोहमा सहभागी बनिन्। कार्यक्रमको आयोजना श्रीजङ्गा युमा साम माङहिम समिति, पाकिमले गरेको थियो।
तेयोङसी श्रीजङ्गा सावन तोङनाम लिम्बू समुदायद्वारा ते-ओङ्सी श्रीजङ्गा सिंह थेबेको जयन्ती मनाउन पालन गर्छन्, जो 18औं शताब्दीका एक विद्वान थिए जसले सिक्किममा लिम्बू परम्परा, संस्कृति, लिपि र धर्म पुनर्जीवित गरेका थिए। लिम्बू समुदायको पहिचान र सांस्कृतिक धरोहर संरक्षणमा उनको योगदानको सम्मानमा हरेक वर्ष सो दिवस पालन गरिन्छ।
यस अवसरमा मुख्य अतिथिका रूपमा उपस्थित विधायक लेप्चाले श्रीजङ्गा युवा साम माङहिमको विधिवत उद्घाटन गरिन्। उनले माङहिममा पूजा-प्रार्थना पनि गरिन्। उनले आफ्नो सम्बोधनमा सहभागीहरूप्रति कृतज्ञता व्यक्त गर्दै कार्यक्रमको सफलतामा आध्यात्मिक नेतृत्वहरू र आयोजक समितिको योगदानको कदर गरिन्। उनले निर्माण कार्यमा सहयोग र मार्गदर्शनको लागि मुख्यमन्त्री र राज्यसभाका सांसदलाई पनि धन्यवाद दिइन्।
उनले माङहिम समुदायको लागि बहुमूल्य सम्पत्ति भएको उल्लेख गर्दै यसलाई कायम राख्न जनताको सामूहिक जिम्मेवारीमाथि जोड दिइन्। उनले भावी पुस्ताका लागि रीतिरिवाज, परम्परागत पोशाक र सांस्कृतिक अभ्यासहरूको संरक्षण र प्रवर्द्धन गर्ने महत्त्वमा पनि जोड दिइन्।
कार्यक्रममा धान नाच, याराक्मा, च्याब्रुङ र यीबा नृत्य लगायत नेपाली नृत्य पनि प्रस्तुत गरिएको थियो। यसैगरी, कार्यक्रममा जमिनदाता र माङहिम कमिटीका सदस्यहरूलाई सम्मानित गरियो।