नाम्ची, 29 जनवरी । नाम्ची जिल्लाका लागि तीन दिवसीय प्रधानमन्त्री विश्वकर्म मेला आज नाम्चीको सेन्ट्रल पार्कमा नाम्ची–सिङ्गीथाङका विधायक सतीशचन्द्र राईले उद्घाटन गरे। मेला भारत सरकारको सूक्ष्म, लघु तथा मध्यम उद्यम मन्त्रालयअन्तर्गत एमएसएमई- विकास एवं सुविधा कार्यालय, गान्तोकद्वारा आयोजना गरिएको हो। मेलाको मुख्य उद्देश्य परम्परागत कारीगर तथा हस्तकला व्यवसायीहरूको प्रवर्द्धन र सशक्तीकरण गर्नु रहेको छ।उद्घाटन कार्यक्रमलाई सम्बोधन गर्दै विधायक सतीशचन्द्र राईले यो मेला स्थानीय कारीगरहरूको विकासमा महत्वपूर्ण भूमिका खेल्ने बताए। उनले प्रधानमन्त्री विश्वकर्म योजना अत्यन्त लाभदायक र प्रभावकारी पहल भएको उल्लेख गर्दै युवाहरूलाई यस अवसरबाट वञ्चित नहुन आग्रह गरे।कौशल विकासको महत्त्वलाई जोड दिँदै उनले योजनाअन्तर्गत प्रदान गरिने निःशुल्क तालिमको फाइदा उठाएर दीर्घकालीन लाभ लिन युवाहरूलाई प्रेरित गरे। साथै, सेन्ट्रल पार्कका दोकान सञ्चालकहरूलाई स्थानीय कारीगरहरूलाई सहयोग गर्न आह्वान गर्दै सामूहिक प्रगति सबैका लागि हितकर हुने बताए।त्यसैगरी, उनले कारीगर तथा स्वयं सहायता समूहहरूलाई आफ्नो छुट्टै पहिचान झल्किने डिजाइन शैली विकास गर्न सुझाउ दिँदै यसले बिक्री वृद्धि गर्न मद्दत गर्ने बताए।कार्यक्रममा नाम्ची जिल्लाकी जिल्लापाल अनुपा तामलिङले प्रधानमन्त्री विश्वकर्म योजना कारीगरहरूको समग्र उत्थानका लागि शुरु गरिएको बताइन्। योजनाले सहज रूपमा लाभ उपलब्ध गराए पनि अझै धेरै योग्य कारीगरहरूले यसको फाइदा नलिएको पनि उनले उल्लेख गरिन्। उनले योजनाअन्तर्गत निःशुल्क तालिम र उपकरण उपलब्ध गराइने जानकारी दिँदै कारीगरहरूलाई यी सुविधाहरूको पूर्ण उपयोग गर्न आग्रह गरे।
