स्ट्रिट फूड प्रकरण: भाजपा महिला मोर्चाद्वारा जिम्मेवार पुलिस कर्मी विरुद्ध कडा कारबाहीको माग

गान्तोक, 10 मार्च । राजधानीको वेस्ट पोइन्ट मल छेउ महिला ​स्ट्रिट फूड भेन्डरहरू विरुद्ध भएको कथित अभद्र व्यवहारको व्यापक आलोचना भइरहेको छ। उक्त घटनालाई लिएर सामाजिक सञ्जालमा तीव्र आलोचनाका साथै विभिन्न राजनीतिक दलहरूले पनि कडा प्रतिक्रिया जनाइरहेका छन्। भाजपा सिक्किम महिला मोर्चाले पनि उक्त घटनाको भत्सर्ना जनाउॅंदै सम्बन्धित पुलिस कर्मीहरू विरुद्ध कडा कारबाहीको माग गरेको छ।
भाजपा सिक्किम महिला मोर्चा अध्यक्ष सृजना छेत्रीले गान्तोकको वेस्ट प्वाइन्ट मल नजिकै सिक्किम पुलिसले मध्यरातमा महिला स्ट्रिट फूड भेन्डरहरू विरुद्ध गरेको कथित कारबाहीको कडा निन्दा गरेकी छन्। पुलिस कर्मीहरूले महिला स्ट्रिट फूड भेन्डरहरूको जीविकोपार्जनका सामानहरू निर्दयतापूर्वक फ्याँकिदिएको उनले आरोप लगाएकी छन्। उनले आफ्नो परिवारको पालनपोषण गर्न इमान्दार जीवनयापन गर्ने यी महिलाहरूलाई अपमानित गरिएको विज्ञप्तिमा बताएकी छन्।
उनले महिला विक्रेताहरू विरुद्ध यस्तो व्यवहार अस्वीकार्य छ भन्दै पुलिसको कारबाहीलाई मर्यादा र मौलिक अधिकारको घोर उल्लङ्घन ठहर गरेकी छन्। उनले तत्काल जॉंच र जिम्मेवार अधिकारीहरू विरुद्ध कडा कारबाहीको माग गरेकी छन्।
उल्लेखनीय छ, राजधानीको वेस्ट पोइन्ट मल छेउ अबेर राति ​महिला स्ट्रिट फूड भेन्डरहरूका सरसामान कथित पुलिस कर्मीहरूले फ्याँकिदिएको भिडियो भाइरल भएको थियो। यस घटनाको सामाजिक सञ्जाल तीव्र आलोचना भइरहेको छ। अर्कातिर, सदर पुलिसले यस घटनालाई लिएर छानबिन गरिरहेको कुरा पनि प्रकाशमा आएको छ।