एएसडीईएले एएसजीईए ग्रुप सी अनि डीका नवनिर्वाचित पदाधिकारीहरूलाई दियो बधाई

गान्तोक, 19 मार्च । अल सिक्किमीज डिप्लोमा इन्जिनियर्स एसोसिएशन (एएसडीईए) ले अखिल सिक्किम सरकारी कर्मचारी संघ (एएसजीईए) ग्रुप सी अनि डी- का अध्यक्ष सोमनाथ अधिकारीलगायत नवनिर्वाचित सबै पदाधिकारीहरूलाई हार्दिक बधाई दिएको छ। लगभग दुई दशकको लामो अन्तरालपछि संघको स्थायी कार्यकारी निकायको गठनलाई सहजीकरण गरेकोमा मुख्यमन्त्री प्रेमसिंह तामाङको गतिशील र दूरदर्शी नेतृत्वप्रति पनि एएसडीईएले हार्दिक कृतज्ञता व्यक्त गरेको छ।
एएसडीईएकी प्रचार सचिव छुमिला भोटियाले आज जारी प्रेस बयानमा सरकार निरन्तर कर्मचारीहरूको पक्षमा रहेको र सरकार समक्ष राखिएका वास्तविक मागहरूप्रति सकारात्मक प्रतिक्रिया दिँदै आएको बताएकी छन्। उनले सी र डी कर्मचारीहरूका चिन्तालाई प्रतिनिधित्व गर्न एक संरचित र मर्यादित मञ्चको खॉंचो थियो भने यो स्थायी निकायको गठनसँगै सरकारको पहल मार्फत त्यो महत्वपूर्ण कमीलाई प्रभावकारी रूपमा सम्बोधन गरिएको उल्लेख गरेकी छन्।
प्रचार सचिवले निर्वाचन प्रक्रियालाई सहज, पारदर्शी र सफल रूपमा सञ्चालन गरेकोमा निर्वाचन आयोगप्रति पनि कृतज्ञता व्यक्त गरेकी छन्। उनले अभिषेक खरेललाई एएसडीईएले महासचिवको महत्वपूर्ण पदको लागि मनोनयन गरेको थियो भन्दै उनको जित संघको लागि मात्र नभई सिक्किमका सम्पूर्ण इन्जिनियरिङ समुदायको लागि पनि एक महत्वपूर्ण उपलब्धि रहेको बताएकी छन्।
एएसडीईएले नवनिर्वाचित निकायप्रति आफ्नो पूर्ण विश्वास र भरोसा व्यक्त गर्दै उनीहरूले आफ्नो जिम्मेवारीलाई पूर्ण न्याय गर्नेछन् तथा इमानदारी, प्रतिबद्धता र उद्देश्यको भावनाका साथ प्रतिनिधित्व गर्नेछन् भनी विश्वास व्यक्त गरेको छ।