२०२९ को विधानसभा चुनाउमा सीएपीले सिक्किममुखी सरकार गठन गर्ने गणेश राईको दाबी

गान्तोक, अगस्त 2026।सिटिजन एक्सन पार्टी (सीएपी) सिक्किमका अध्यक्ष गणेश राईले नाम्चेबुङ विधानसभा निर्वाचन क्षेत्रको आफ्नो दुई दिवसीय भ्रमण सम्पन्न गरेका छन्। भ्रमणको अन्तिम दिन आज सुमिन लिञ्चे ग्राम पञ्चायत एकाई अन्तर्गत माङथाङमा पार्टीका नेता, कार्यकर्ता तथा स्थानीयवासीको उपस्थितिमा विधानसभा निर्वाचन क्षेत्र कार्यकारिणी परिषद् (एसीईसी) स्तरीय बैठक सम्पन्न भयो।सीएपी अध्यक्ष राईले १२ अगस्तदेखि आफ्नो भ्रमण शुरु गरेका थिए। भ्रमणका क्रममा उनले आसाम लिङ्जे क्षेत्रमा स्थानीयवासी, विद्यार्थी तथा सर्वसाधारणसँग भेटघाट र अन्तरक्रिया गरे। यसै क्रममा आज आसाम लिङ्जे जीपीयू अन्तर्गत गैरीगाउँ वार्डका पञ्चायत सदस्य दीपेन्द्र शर्मा सीएपीमा सामेल भएको प्रेस विज्ञप्तिमा उल्लेख छ।भ्रमणको दोस्रो दिन राईले बिहान स्थानीय दुग्ध कृषकहरूसँग भेटघाट गर्नुका साथै दूध सङ्कलन केन्द्रको भ्रमण गरे। उनले दुग्ध कृषकहरूले भोगिरहेका समस्या तथा चुनौतीहरूबारे जानकारी लिँदै स्थानीय कृषि समुदाय र ग्रामीण अर्थतन्त्रलाई सुदृढ़ बनाउने पार्टीको नीतिगत दृष्टिकोण तथा प्रतिबद्धता साझा गरे।दिउँसो सुमिन लिञ्चे जीपीयू अन्तर्गत माङथाङ वार्डमा एसीईसी स्तरीय बैठक सम्पन्न भयो। बैठकमा एसीईसी अध्यक्ष सेभेरिन राई लगायत पार्टी कार्यकर्ता तथा स्थानीयवासीको सहभागिता थियो। बैठकका क्रममा लोअर सुमिनका कर्णबहादुर छेत्री र बुद्धिमान राई पार्टीमा सामेल भएकाे बताइएको छ। बैठकलाई सम्बोधन गर्दै पार्टी अध्यक्ष गणेश राईले सीएपी साधारण सिक्किमेली जनताको जीवनमा अर्थपूर्ण परिवर्तन ल्याउन दृढ़तापूर्वक प्रतिबद्ध रहेको बताए। उनले सिक्किमका जनताको अधिकार, सम्मान र कल्याणका लागि पार्टीले निरन्तर संघर्ष गरिरहने बताए।राईले राज्यभरि पार्टीप्रति जनसमर्थन क्रमशः बढ्दै गएको दाबी गर्दै नाम्चेबुङ क्षेत्रका जनताले पनि पार्टीलाई वैकल्पिक सरकारका रूपमा हेर्न थालेको बताए। उनले आगामी २०२९ को विधानसभा चुनाउमा वर्तमान एसकेएम सरकारलाई कडा चुनौती दिँदै सीएपीले सिक्किममुखी सरकार गठन गर्ने विश्वास व्यक्त गरे।उनले पार्टी संगठनलाई तल्लो तहसम्म सुदृढ़ बनाउन आफ्नो प्रमुख प्राथमिकता रहेको दोहोर्याए। यसै उद्देश्यका साथ आफुले सिक्किमका विभिन्न निर्वाचन क्षेत्रहरूको भ्रमण गरी जनतासँग प्रत्यक्ष भेटघाट गर्ने, पार्टी कार्यकर्तासँग अन्तरक्रिया गर्ने तथा उनीहरूका समस्या, गुनासा र आकांक्षाहरू बुझ्ने कार्यलाई निरन्तरता दिइरहेको बताए।