सीएपी विद्यार्थी परिषदले राज्यका विद्यार्थीहरूसँग सम्पर्क र संवाद बढाउने

गान्तोक, 25 जून । सिटिजन एक्सन पार्टी (सीएपी) सिक्किमको विद्यार्थी परिषदको एक महत्वपूर्ण समन्वय बैठक आज परिषदका उपाध्यक्ष-प्रभारी कौशल लोहागनको नेतृत्वमा नाम्ची जिल्ला पार्टी कार्यालयमा बस्यो। बैठकमा नाम्ची जिल्ला अध्यक्ष स्टेफेन गुरुङ, विद्यार्थी परिषदका अध्यक्ष सहदेव छेत्री, प्रवक्ता तथा परिषद संयोजक अल्बर्ट गुरुङ लगायतका पदाधिकारीहरूको उपस्थिति रहेको थियो।बैठकमा विद्यार्थी परिषदको संगठनात्मक संरचनालाई अझ सुदृढ़ बनाउने तथा सिक्किमभरिका विद्यार्थीमाझ परिषदको पहुँच विस्तार गर्न प्रभावकारी रणनीति निर्माण गर्ने विषयमा विशेष छलफल गरिएको प्रेस विज्ञप्तिमा उल्लेख छ। साथै शिक्षा, रोजगारीका अवसर, सीप विकास तथा युवा सशक्तीकरणसँग सम्बन्धित विद्यार्थीहरूले भोगिरहेका विभिन्न चुनौतीहरूबारे विस्तृत रूपमा विचार-विमर्श गरिएको बताइएको छ।परिषदले विद्यार्थीहरूका आवाज, गुनासा तथा समस्याहरू उठान गर्ने र समाधानका लागि पहल गर्न एक सशक्त तथा विश्वसनीय मञ्चका रूपमा आफूलाई स्थापित गर्ने प्रतिबद्धता पुनः दोहोर्यायो। सदस्यहरूले राज्यभरिका विद्यालय, महाविद्यालय तथा विश्वविद्यालयका विद्यार्थीहरूलाई समेट्दै एक गतिशील र समावेशी विद्यार्थी आन्दोलन निर्माण गर्नुपर्ने आवश्यकतामा जोड दिए।छलफलका क्रममा सीएपी सिक्किमका प्रगतिशील तथा युवा-मैत्री नीतिहरूका कारण युवा तथा विद्यार्थी समुदायबीच पार्टीप्रतिको आकर्षण निरन्तर बढिरहेको उल्लेख गरियो। विद्यार्थी परिषदले राज्यका सबै जिल्ला तथा निर्वाचन क्षेत्रका विद्यार्थीहरूसँग अझ सघन रूपमा सम्पर्क र संवाद बढाउने, उनीहरूका गुनासा, चासो तथा आकांक्षाहरूलाई प्रभावकारी रूपमा सम्बोधन गर्ने संकल्प गरेको छ। विद्यार्थी परिषदले विद्यार्थीहरूलाई सशक्त बनाउने, भविष्यका नेतृत्वकर्ताहरूको विकास गर्ने तथा सिक्किमका युवाहरूका लागि अझ उज्यालो, सबल र समृद्ध भविष्य निर्माण गर्ने आफ्नो अभियानमा दृढ़तापूर्वक अघि बढिरहने जनाएको छ।