बर्फुङ निर्वाचन क्षेत्रका ३५ एसडीएफ परिवार एसकेएम पार्टीमा सामेल

गान्तोक, 01 जुलाई । बर्फुङ निर्वाचन क्षेत्रका ३५ परिवार सिक्किम डेमोक्रेटिक फ्रन्ट (एसडीएफ) परित्याग गरी सिक्किम क्रान्तिकारी मोर्चा (एसकेएम) मा प्रवेश गरेका छन्। गान्तोकस्थित एसकेएम ठेकेदार शाखाका प्रभारी तथा पार्टीका उपाध्यक्ष टाशी ग्याल्पो भोटियाको निवासमा आयोजित कार्यक्रममा उनीहरूलाई पार्टीमा स्वागत गरिएको बताइएको छ।विज्ञप्तिमा भनिएको छ, नवप्रवेशी सदस्यहरूले एसकेएम सरकारको जनमुखी, गरिबमैत्री तथा विकासमुखी शासनप्रति पूर्ण विश्वास व्यक्त गर्दै राज्यको समग्र विकास, समृद्धि र जनसेवाका लागि एकताबद्ध भएर कार्य गर्ने प्रतिबद्धता जनाएका छन्।उक्त कार्यक्रममा विधायक रिक्सल दोर्जी भोटियाका ओएसडी शिवकुमार राई, सीएलसी अध्यक्ष नारायण गोपाल गुरुङ तथा विधायकका पीए अशोक राई पनि उपस्थित थिए। विधायक भोटियाको नेतृत्वमा राभाङ्लामा चाँडै एक भव्य औपचारिक प्रवेश कार्यक्रम आयोजना गरिने जानकारी दिइएको छ।