एसकेएम पार्टीले गोर्खा सेवा सेनाका सदस्यहरू विरुद्ध दर्ता गरिएको एफआईआरको स्वागत जनायो

गान्तोक, 07 जून। सिक्किम क्रान्तिकारी मोर्चा (एसकेएम) पार्टीले सिक्किम सरकारको गृह विभागद्वारा गोर्खा सेवा सेनासँग सम्बन्धित नोएल शर्मा, बिक्रमादी राई र सुभाषमणि सिंह विरुद्ध एफआईआर दर्ता गरेको कुरालाई खुलेर स्वागत जनाएको छ। सरकारको यस्तो निर्णयले सिक्किमको कानुनी व्यवस्था, सामाजिक शान्ति र पहिचानको रक्षा गर्नेछ भन्ने एसकेएमले विश्वास व्यक्त गरेको छ।
एसकेएम पार्टीका प्रवक्ता बिकास बस्नेतले आज जारी प्रेस विज्ञप्तिमा भनेका छन्, यी व्यक्तिहरूले “दार्जिलिङ–सिक्किम एकीकरण” भन्ने अस्वीकार्य र अविवेकी विषयमा कार्यक्रम आयोजना गर्न गैरकानुनी तरिकाले सिक्किम सरकारको लोगो र “सुनौलो, समृद्ध अनि समर्थ सिक्किम” को आधिकारिक थिम प्रयोग गरेका छन्। सुभाषमणि सिंह गृह विभागमा आरटीआई अपीलको कानुनी सुनुवाईमा सहभागी भएका थिए, तर त्यसपछि पत्रकार सम्मेलनमार्फत त्यस सुनुवाइलाई “सरकारसँग छलफल भएको” झैँ देखाउँदै जनतालाई भ्रममा पार्ने झुटो प्रचार गरिएको थियो।
सिक्किम सरकारको भनाइ अनुसार, यी सबै कार्यहरू सिक्किम राज्य सरकारको छविमा आघात पुर्‍याउने, सामाजिक सद्भाव बिगार्ने र जनताको भावना भड्काउने नियोजित प्रयास हुन्। उनीहरू विरुद्ध भारतीय न्याय संहिता, 2023 अन्तर्गत धारा 152 (राष्ट्रिय एकता र अखण्डतामा खतरा पुर्‍याउने), धारा 196 (समुदायबीच वैमनस्य फैलाउने), र धारा 336 (झुटो दस्तावेज बनाएर जनतालाई भ्रममा पार्ने) लगायतका गम्भीर मुद्दा लगाइएको छ।
एसकेएम गोर्खा सेवा सेनाको कार्यलाई राज्यको संवैधानिक मर्यादा र सांस्कृतिक पहिचानमाथिको गम्भीर हमला ठहर गरेको छ। प्रवक्ता बस्नेतले भनेका छन्, सिक्किम र दार्जिलिङबीच सदियौंदेखिको कायम आपसी समझदारी र भाइचारा यस्ता केही सीमित स्वार्थी तत्वहरूले बिगार्न खोज्नु अत्यन्त निन्दनीय छ। सिक्किमवासीहरूले कहिल्यै पनि “दार्जिलिङ–सिक्किम एकीकरण” भन्ने अनौठो र अवास्तविक विचारको समर्थन गरेका छैनन्, बरु सधैं गोर्खाल्याण्ड राज्यको मागलाई संवेदनशील रूपले समर्थन गरेका छन्।
उनले एसकेएम पार्टी र मुख्यमन्त्री पीएस गोलेले पार्टी स्थापनाकालदेखि नै यस्ता समाज विरोधी विचारको कठोर विरोध गर्दै आएको स्पष्ट गरेका छन्। वर्तमान सरकारले सिक्किमको स्वाभिमान र विशेष अधिकार जोगाउन कुनै पनि हदसम्म जानेछ भनी उनले दृढ विश्वास व्यक्त गरेका छन्। उनले जनताको भावना आहत पार्ने यस्ता कार्यलाई सधैंका लागि रोकिने गरी कडा कानुनी कारबाही हुने पनि विश्वास व्यक्त गरेका छन्, ताकि भविष्यमा कुनै पनि व्यक्तिले व्यक्तिगत स्वार्थ वा राजनीतिक लाभका लागि यस्ता अनावश्यक र समाज विघटनकारी एजेन्डा उठाउने साहस नगरोस्।
उनले सम्पूर्ण सिक्किमवासीहरूलाई एकतामा बस्न, सतर्क रहन र यस्तो अनुशासनविहीन कार्यहरूको विरोधमा एक स्वरमा उभिन अपील गरेका छन्। उनले हामी सबैले मिलेर हाम्रो राज्यको शान्ति, पहिचान र अखण्डताको रक्षा गर्नुपर्छ भनी आह्वान पनि गरेका छन्।