जनगणना 2027 माथि पहिलो चरणको राज्यस्तरीय बैठक सम्पन्न

गान्तोक, 05 अगस्त। जनगणना 2027 लाई लिएर पहिलो चरणको राज्यस्तरीय बैठक आज राजधानीको टाशीलिङ सचिवालयमा राज्यका मुख्य ​सचिव आर. तेलाङको अध्यक्षतामा बस्यो। यो बैठकले लगभग 16 वर्षको अन्तरालपछि सञ्चालन भइरहेको दशवार्षिक जनगणना अभ्यासको लागि सिक्किमको तयारीको औपचारिक शुरुवात गरेको बताएको छ।
जानकारी अनुसार, राज्य सरकारले मुख्य सचिवको अध्यक्षतामा उच्चस्तरीय राज्य जनगणना समन्वय समिति गठन गरेको छ। समितिमा सम्बद्ध विभागका वरिष्ठ अधिकारीहरू सामेल छन्, जसको उद्देश्य प्रभावी अन्तर-विभागीय समन्वय र जनगणनाका सबै चरणहरूको सफल क्रियान्वयन सुनिश्चित गर्नु रहेको छ।
बैठकमा जनगणना सञ्चालन निर्देशालयका निर्देशक कर्मा आर. बोन्पोले आगामी जनगणना प्रक्रियाको बारेमा विस्तृत जानकारी गराए। उनले 30 जून, 2025 सम्म प्रशासनिक एकाइहरूको अद्यावधिक स्थिति, एकभन्दा बढी ग्राम पञ्चायत एकाई भएका गाउँहरूमा चुनौती, स्व-गणनाको लागि डिजिटल उपकरणहरूको शुरुवात र घर-सूचीकरण र शुल्क दर्ता तयारीको रणनीतिक योजना जस्ता महत्वपूर्ण घटकहरूमाथि प्रकाश पारे।
निर्देशक बोन्पोले डेटा सङ्कलन, डिजिटल लेआउट म्यापिङ, डेटा सुरक्षा प्रोटोकल, पूर्व-परीक्षण सञ्चालन, र जिल्ला जनगणना पुस्तिकाको मस्यौदा तयार पार्न मोबाइल एप्लिकेशनहरूको प्रयोगमाथि पनि प्रकाश पारे।
मुख्य ​सचिव तेलाङले आफ्नो सम्बोधनमा जनगणना प्रक्रियाको सावधानीपूर्वक योजना र त्रुटिरहित कार्यान्वयनको महत्त्वमा जोड दिए। उनले सङ्कलन गरिएको तथ्याङ्कको गुणस्तरले राज्यमा भविष्यमा केन्द्रद्वारा प्रायोजित योजनाहरूको कार्यान्वयन र कोषमा प्रत्यक्ष प्रभाव पार्ने बताए। उनले सबै विभाग र सम्बन्धित अधिकारीहरूलाई गम्भीरताका साथ कार्यमा लाग्न र हरेक चरणमा सठीकताको लागि प्रयास गर्न आग्रह गरे।
बैठकमा खुल्ला चर्चा सत्र पनि सम्पन्न गरियो, जसमा विभिन्न परिचालन मुद्दाहरू र चुनौतीहरूमाथि छलफल गरियो। बैठकले जनगणना 2027 को तयारीमा सिक्किमको सक्रिय अडानलाई प्रकाश पारेको छ, जुन पहिलो पूर्ण डिजिटल जनगणना हुनेछ र यसमा जातीय जनगणना पनि समावेश हुनेछ, जुन देशको डेटा परिदृश्यमा एक महत्वपूर्ण परिवर्तन हो।
बैठकमा विभाग प्रमुखहरू, जिल्लापालहरू, सबै जिल्लाका प्रतिनिधिहरू, जनगणना सञ्चालन निर्देशनालयका वरिष्ठ अधिकारीहरू र राज्य सरकारका विभिन्न विभागका अधिकारीहरू उपस्थित थिए।