डीएसीएसले मुख्यमन्त्रीलाई 25.26 लाख रूपियॉंको लाभांश प्रदान गर्यो

गान्तोक, 09 मार्च । डेन्जोङ कृषि सहकारी संस्था लिमिटेड (डीएसीएल) ले राज्य सरकारलाई २५ लाख २६ हजार रूपियॉंको लाभांश चेक प्रदान गरेको छ। डीएसीएसका प्रबन्ध निर्देशक धीरज प्रधानले मुख्यमन्त्री प्रेमसिंह तामाङलाई आज चेक हस्तान्तरण गरे।
मुख्यमन्त्रीले संस्थाका नेतृत्व र सदस्यहरूको समर्पण र जिम्मेवार शासनको सराहना गर्दै उनीहरूका प्रयासले किसान र व्यापक समुदायको कल्याणमा उल्लेखनीय योगदान पुर्याएको बताए।
बैठकका क्रममा डीएसीएसले सिक्किममा कुखुरा उत्पादक सहकारी संस्थाहरूद्वारा स्थानीय रूपमा उत्पादित कुखुराको बजारीकरणलाई सुदृढ पार्न लगनशीलताका साथ काम गरिरहेको मुख्यमन्त्रीलाई बताइयो। संस्थाले राज्यमा तैनाथ सेना र अर्धसैनिक बलहरूलाई कुखुरा उत्पादनहरू पनि आपूर्ति गरिरहेको जानकारी गराइयो।
यस अतिरिक्त, आगामी अप्रेल महिनादेखि कुखुराको दर परिमार्जन गर्ने, साथै राज्यमा फ्रोजेन पोल्ट्री प्रोसेसिङ प्लान्ट स्थापना गर्ने प्रस्तावबारे पनि छलफल भयो। राज्य सरकारले प्लान्ट स्थापना गर्न जग्गा उपलब्ध गराउने आश्वासन दिएको सीएमओले आज विज्ञप्तिमा बताएको छ। यस प्रस्तावित पहलले राज्यमा कुखुरापालन बजारलाई अझ बलियो बनाउने साथै सहकारी क्षेत्रका किसानहरू र अन्य सरोकारवालाहरूका लागि थप अवसरहरू सिर्जना गर्ने अपेक्षा गरिएको छ।