गान्तोक, 12 फरवरी। मुख्यमन्त्री प्रेमसिंह तामाङले आज सम्मान भवनमा ‘मेरो अलैंची मेरो धन’ कार्यक्रमको पहिलो समीक्षा बैठकको अध्यक्षता गरे, जसको उद्देश्य राज्यमा किसानहरूका लागि सहयोग सुदृढ़ बनाउनु र ठूलो अलैंची खेतीको दिगोपन बढाउनु रहेको छ।
बैठकमा मुख्यमन्त्रीले यस पहलको प्रगतिको समीक्षा गर्दै ठूलो अलैंची खेतीसँग सम्बन्धित प्रमुख विषयहरूमा राज्य विज्ञान तथा प्रविधि विभागले गरिरहेको कामको सराहना गरे। उनले विभागलाई सामूहिक रूपमा काम गर्न तथा क्षेत्रलाई अझ बलियो बनाउन र किसानहरूलाई सहयोग गर्न नवीन दृष्टिकोण अपनाउन प्रोत्साहित गरे।
यस अवसरमा अलैंची उत्पादन गर्ने क्षेत्रहरूमा क्षेत्र पहुँच, अनुगमन र विस्तार गतिविधिहरू बढाउनका लागि महिन्द्रा बोलेरो क्याम्पर गाडी औपचारिक रूपमा डीएसटी टोलीलाई हस्तान्तरण गरिएको सीएमओले बताएको छ। यसरी नै कार्यक्रममा अलैंची बालीलाई असर गर्ने रोगलाई प्रभावकारी रूपमा व्यवस्थापन गर्न मद्दत गर्ने उद्देश्यले बोर्डो मिश्रणको नवीन प्रयोग मार्फत ठूलो अलैंचीमा ब्लाइट रोग नियन्त्रणको लागि अभ्यासहरूको प्याकेजको पनि विमोचन गरियो।
यस पहलको एक भागको रूपमा कृषक अलैंची प्रयोगशाला स्थापनाको लागि टोकन वितरण गरियो। यसका साथै, अलैंची खेतीमा किसान-नेतृत्वको नवप्रवर्तन र प्रयोगलाई समर्थन गर्न सहभागी बिरुवा प्रजनन कार्यक्रम अन्तर्गत दश प्रगतिशील किसानहरूलाई प्रतिव्यक्ति पचास हजार रूपियॉंको आर्थिक सहयोग प्रदान गरियो।
कार्यक्रममा किसानहरूद्वारा अनुभव आदान-प्रदान गर्नुका साथै क्षेत्र-स्तरीय चुनौतीहरूमाथि छलफल, र विज्ञान तथा प्रविधि विभागका प्रधान सचिव डा. सन्दीप ताम्बेद्वारा ‘विज्ञानदेखि नीति सुझाउहरू’ मा प्रस्तुती दिएका थिए।
मुख्यमन्त्रीले किसानहरू र विज्ञहरूबाट प्रत्यक्ष रुपमा सुन्न पाउन उत्साहजनक र मूल्यवान रहेको बताए। उनीहरूको अनुभव, विचार र प्रतिबद्धताले अलैंची क्षेत्रलाई सुदृढ़ पार्न सरकारको प्रयासलाई निरन्तर मार्गदर्शन गर्ने उनले बताए।
मुख्यमन्त्रीले अलैंची कृषकहरू र सिक्किमको कृषि क्षेत्रको लागि बलियो र समृद्ध भविष्य सुनिश्चित गर्न विज्ञान, नवप्रवर्तन र सामूहिक सामुदायिक प्रयासको लाभ उठाउने राज्य सरकारको प्रतिबद्धता दोहोर्याए।
