गान्तोक, 21 जून। पत्रकार समीरहाङ सुब्बा प्रेस क्लब अफ् सिक्किमको अध्यक्ष निर्वाचित बनेका छन्। सुब्बाले आफ्नो एकमात्र प्रतिद्वन्दी पत्रकार डिल्लीराम दुलाललाई पराजित गर्दै अध्यक्ष निर्वाचित बनेका हुन्।
राजधानीको तादोङस्थित प्रेस क्लबको कार्यालयमा आज संस्थाको नयॉं कार्यकारिणी समिति गठनका लागि चुनाउ सम्पन्न भयो। चुनाउ समितिका अध्यक्ष पुरण तामाङको अगुवाईमा आज प्रेस क्लबको अध्यक्ष लगायत अन्य पदहरूका लागि मतदान सम्पन्न गरियो। चुनाउ समितिका अन्य सदस्यहरू उषा शर्मा, अम्बर गुरुङ र जीएस लिम्बू थिए।
अध्यक्ष पदका लागि दुई जना उम्मेदवारले नामाङ्कन बुझाएका थिए। समीरहाङ लिम्बूले 86 मत प्राप्त गरेर अध्यक्ष निर्वाचित भएको छ। प्रतिद्वन्दी डिल्लीराम दुलालले 61 भोट प्राप्त गरे। यसरी नै 75 भोट पाएर सुक राज राई (एरोन )कार्यकारी अध्यक्षको पदमा निर्वाचित बनेका छन्। यस पदका लागि अर्का प्रतिद्वन्दी इश्वर न्यौपानेले 71 भोट प्राप्त गरेका छन्।
यसरी नै उपाध्यक्ष पदमा बिकास छेत्री, दिपेन छेत्री र रबिन शर्मा निर्वाचित बनेका छन्। उनीहरूले क्रमश: 98, 90 र 81 मत प्राप्त गरेका छन्। संयुक्त सचिवको पदमा आनन्द ओबराय, एनबी छेत्री र नवद्वीप शर्मा विजयी बनेका छन्। उनीहरूले क्रमश: 104, 98 र 96 भोट प्राप्त गरेका छन्।
संस्थाको कोषाध्यक्ष पदका लागि दुई जना उम्मेदवार मैदानमा थिए। यस पदमा जगनाथ शर्मा विजयी बनेका छन्। उनले 84 भोट प्राप्त गरेर आफ्ना प्रतिद्वन्दी रुद्रमणि शर्मालाई पराजित गरे, जसले 62 भोट प्राप्त गरेका छन्।
उल्लेखनीय छ, महासचिव पदमा होमनाथ दवाडी, प्रचार सचिव पदमा पंकज ढुङ्गेल र सह कोषाध्यक्ष पदमा सुबेन प्रधान निर्विरोध निर्वाचित भएका छन्। नवनिर्वाचित कार्यकारी समितिको कार्यकाल 2026–27 सम्म रहनेछ।
