पाकिम जिल्लाबाट ५३ परिवार भारतीय जनता पार्टीमा सामेल

गान्तोक, 02 अगस्त । भारतीय जनता पार्टी (भाजपा) सिक्किमले आज पाकिम जिल्लाको रिनाक तार्पिनमा जिल्लास्तरीय समन्वय बैठक आयोजना गर्यो। कार्यक्रममा प्रदेश अध्यक्ष डीआर थापा, महासचिव दिनेशचन्द्र नेपाल, पाकिम जिल्ला अध्यक्ष प्रेम छेत्री तथा पार्टी कार्यकर्ताहरूको उपस्थिति रहेको थियो।बैठकका क्रममा पाकिम जिल्लाका ५३ परिवार भारतीय जनता पार्टीमा सामेल भएको प्रेस विज्ञप्तिमा उल्लेख छ। नवप्रवेशीहरूलाई प्रदेश अध्यक्ष डीआर थापा तथा उपस्थित नेताहरूले स्वागत गरे।कार्यक्रमलाई सम्बोधन गर्दै प्रदेश अध्यक्ष डीआर थापाले नवप्रवेशी सदस्यहरूलाई स्वागत गर्दै जनसेवा, संगठन सुदृढीकरण तथा राष्ट्र निर्माणमा समर्पित भएर काम गर्न आग्रह गरे। उनले प्रधानमन्त्री नरेन्द्र मोदीको नेतृत्वमा भारत ‘विकसित भारत’ निर्माणतर्फ निरन्तर अघि बढिरहेको उल्लेख गर्दै यस परिवर्तनकारी यात्रामा युवाहरूको भूमिका अत्यन्त महत्वपूर्ण रहेको बताए।थापाले देश विकास र अवसरको दिशामा अघि बढिरहेको बेला केही स्थानीय राजनीतिक नेताहरूले विभाजनकारी राजनीति गर्दै युवाहरूलाई द्वन्द्व र हिंसाको संस्कृतितर्फ उक्साइरहेको भन्दै चिन्ता व्यक्त गरे। उनले युवाहरूलाई यस्ता नकारात्मक प्रभावबाट टाढा रहँदै स्वरोजगार, उद्यमशीलता र आत्मनिर्भरताको मार्ग अपनाउन आह्वान गरे।त्यसैगरी, भाजयुमो प्रदेश अध्यक्ष ललित पोखरेल शर्माले मोदी सरकारद्वारा युवाहरूको सशक्तीकरणका लागि सञ्चालन गरिएका विभिन्न योजनाबारे जानकारी गराए। उनले उद्यमशीलता, सीप विकास तथा रोजगारीका क्षेत्रमा केन्द्र सरकारले युवाहरूका लागि अभूतपूर्व अवसर सिर्जना गरेको बताए।हालैका घटनाक्रमबारे बोल्दै शर्माले नीट सम्बन्धी विषयमा पनि धारणा राख्दै युवाहरूलाई समाजविरोधी तत्व तथा राजनीतिक स्वार्थबाट प्रेरित प्रचारप्रसारबाट भ्रमित नहुन आग्रह गरे। उनले सिक्किमका युवाहरूलाई शिक्षा, सीप विकास, नवप्रवर्तन तथा करियर निर्माणमा केन्द्रित रहन र राजनीतिक लाभका लागि उक्साइने अव्यवस्थित तथा असभ्य विरोध प्रदर्शनबाट टाढा रहन अनुरोध गरे।