पोक्सो मामिलामा दोषी ठहर भएका आरोपीलाई 20 साल कारावासको कठोर सजाय

गान्तोक, 02 अगस्त। यौन अपराधहरूबाट बालबालिकाको संरक्षण अधिनियम (पोक्सो) मामिलाका आरोपी दोषी ठहर भएपछि न्यायालयले आरोपी विरुद्ध कठोर सजाय सुनाएको छ। गेजिङ जिल्लाको विशेष पोक्सो कोर्टले आरोपी जय नारायण मण्डललाई पोक्सो मामिलामा दोषी ठहर गर्दै 20 वर्ष कारावासको सजाय सुनाएको छ। मूल रूपमा पश्चिम बंगालको उत्तर दिनाजपुर निवासी जोय हाल बर्मेकमा बस्दै आएका थिए। उनीमाथि एक नाबालिगमाथि यौन दुर्व्यवहारको आरोप थियो।
पुलिस सूत्रहरूबाट प्राप्त जानकारी अनुसार, 15 अप्रेल, 2023 मा देन्ताम पुलिस थानामा आरोपी विरुद्ध पोक्सो अधिनियम र जुभिनायल जस्टिस एक्ट अन्तर्गत मामिला दर्ता भएको थियो। कोर्टले आरोपीलाई दोषी ठहर गर्दै 31 जुलाई, 2025 का दिन यस्तो फसेला सुनाएको छ।
यस मामिलाको छानबिन पीआई सागर सुब्बाले गरेका थिए। उनको प्रयासको पुलिस विभागले सराहना गरेको छ भने उनको समर्पणको लागि उनलाई पुरस्कारको लागि सिफारिश पनि गरिएको छ।
गेजिङ जिल्लाका पुलिस अधीक्षक छिरिङ शेर्पाले पीआई सुब्बालाई बधाई दिॅंदै यस्ता परिणामहरूले अरूलाई पनि कडा परिश्रम गर्न प्रेरित गर्नुपर्छ, विशेष गरी बालबालिकासँग सम्बन्धित मामिलाहरूमा भनी बताएका छन्।