भाजपा सिक्किमले पिउने पानीको संकटलाई समाधान गर्न मुख्यमन्त्रीलाई व्यक्तिगत हस्तक्षेपको अनुरोध गऱ्यो

गान्तोक, 10 फरवरी । भारतीय जनता पार्टी (भाजपा) सिक्किमले गान्तोक शहरमा हाल पिउने पानीको व्यापक अभाव देखिएको र यहाँका बासिन्दाहरूले धेरै कठिन परिस्थितिको सामना गर्नु परिरहेको बताएको छ। प्रदेश भाजपाले राज्यका मुख्यमन्त्रीलाई यस विषयमा व्यक्तिगत रूपमा हस्तक्षेप गर्न र यो संकट तुरुन्तै समाधान गर्न विशेष कार्यदल गठन गर्न अनुरोध गरेको छ।
प्रदेश भाजपाका राज्य सचिव निरेन भण्डारी आज जारी एक प्रेस विज्ञप्तिमा गान्तोक शहरमा देखा परिरहेको पिउने पानीको संकटले जन साधारण, विशेष गरी विद्यार्थीहरू र साना व्यवसायीहरूको दैनिक जीवन निकै प्रभावित बनेको बताएका छन्। उनले राते चुमा पानीको मुख्य स्रोत सुक्दै गएको छ भने धेरै पानीका पाइपहरू अवरुद्ध भएको जनाएका छन्। यसका कारण सम्पूर्ण पानी आपूर्ति प्रणाली नै ध्वस्त भएको र मानिसहरू धेरै दिनदेखि पिउने पानीबाट वञ्चित रहेको उनले दाबी गरेका छन्।
विद्यार्थीहरूले हाल आफ्नो परीक्षा दिइरहेका छन् भन्दै उनले पिउने र सरसफाइको लागि सफा पानीको अभावका कारण उनीहरूले आफ्नो पढाइमा ध्यान केन्द्रित गर्न नसकिरहेको बताएका छन्। अर्कातिर, उनले मानिसहरू पीडामा परेका बेला सम्बन्धित विभाग मौन बसेको आरोप पनि लगाएका छन्। उनले अधिकारीहरूलाई प्रत्येक ठाउॅंमा पानीको ट्याङ्कर पठाएर तत्काल राहत प्रदान गर्न अनुरोध पनि गरेका छन्।
यसैगरी, सचिव भण्डारीले चाँडो सामान्य आपूर्ति पुनर्स्थापित गर्न युद्धस्तरमा मर्मत गरिनुपर्ने, दीर्घकालीन समाधानको लागि सरकारले वर्षाको पानी संकलन र अन्य नयाँ पानीका स्रोतहरू हेर्न थाल्नुपर्छ भनी सुझाउ पनि दिएका छन्। उनले मुख्यमन्त्रीलाई यस विषयमा व्यक्तिगत रूपमा हस्तक्षेप गर्न र यो संकट तुरुन्तै समाधान गर्न विशेष कार्यदल गठन गर्न अनुरोध गरेका छन्। यो अवस्था किन यति खराब भयो भन्ने कुराको जवाफदेहिता हुनुपर्छ भन्दै उनले शहरको पानीको समस्यालाई समाधान गर्न अर्को विधानसभा सत्रमा छुट्टै बजेट पनि राख्नु पर्छ भनेका छन्।