माचोङ प्राथमिक स्वास्थ्य केन्द्रको चिकित्सक आवास मर्मतमा अनियमितताको आरोप, भाजपाको शीघ्र जाँचको माग

गान्तोक, 06 अक्टोबर। भाजपा सिक्किमको टोलीले पाकिम जिल्लाअन्तर्गत माचोङ प्राथमिक स्वास्थ्य केन्द्रका चिकित्सक आवास मर्मतसम्बन्धी काममा कथित आर्थिक अनियमितता भएको विषयमा आज सतर्कता विभागमा पुगेर जाँचको अवस्थाबारे जानकारी लिएको छ।टोलीमा भाजपा सिक्किमका प्रवक्ता साङ्गे ग्याछो भोटिया, लिङ्के माचोङका जिल्ला पञ्चायत सदस्य मेगराज शर्मा तथा मङ्गन जिल्ला अध्यक्ष निम पिन्चो भोटिया सहभागी थिए।भाजपाका अनुसार, ५ अगस्त, २०२५ मा सूचनाको अधिकारसम्बन्धी आवेदनमार्फत प्राप्त कागजात र विभिन्न पुनरावेदन सुनुवाइपछि अनियमितता भएको दाबी गरिएको हो। सरकारी लागत अनुमान र मापन पुस्तिकाअनुसार गरिएको स्थलगत निरीक्षणमा चिकित्सक आवासमा वास्तविक रूपमा कुनै मर्मत वा नवीकरणको काम नभएको पाइएको भाजपाको दाबी छ। तर, काम सम्पन्न भएको प्रतिवेदन पेस गरी सरकारी कोषबाट पूर्ण बिल रकम निकासा गरिएको आरोप लगाइएको छ।सम्बन्धित निकायबाट सन्तोषजनक जवाफ नपाएपछि शुरुमा पाकिम पुलिस थानामा उजुरी गरिएको थियो। त्यसपछि ४ जुलाई, २०२६ मा प्राथमिकी वा नियमित मुद्दा दर्ता गरी विस्तृत जाँच गर्न सतर्कता विभागमा औपचारिक उजुरी दिइएको थियो।भाजपाका अनुसार, सतर्कता विभागले उक्त विषयमा औपचारिक जाँच शुरु भइसकेको र कागजात तथा भौतिक प्रमाणहरूको जाँच भइरहेको जानकारी दिएको छ।भाजपाले सतर्कता विभागको निष्पक्ष जाँचप्रति विश्वास व्यक्त गर्दै राज्यका गृह मन्त्रीलाई पुलिस तथा जाँच निकायमार्फत छानबिनलाई शीघ्र अघि बढाउन आग्रह गरेको छ। साथै, भ्रष्टाचारविरुद्ध सरकारको ‘शून्य सहनशीलता’ को प्रतिबद्धता कार्यान्वयन गर्न माग गरेको छ।