‘मेरो उत्पादन, मेरो गौरव’ नारासहित सिक्किममा १२औँ राष्ट्रिय हस्तकरघा दिवस मनाइयो

गान्तोक, 07 अगस्त। वाणिज्य तथा उद्योग विभागअन्तर्गत हस्तकला तथा हस्तकरघा निर्देशनालयले आज १२औँ राष्ट्रिय हस्तकरघा दिवसको अवसरमा ‘मेरो उत्पादन, मेरो गौरव’ भन्ने नारासहित एकदिने सचेतनामूलक कार्यक्रम आयोजना गर्यो। निर्देशनालय परिसरमा आयोजित कार्यक्रममा वाणिज्य तथा उद्योग विभागका मन्त्री टीटी भोटिया प्रमुख अतिथिका रूपमा उपस्थित थिए।कार्यक्रमको उद्देश्य हस्तकरघा क्षेत्रप्रति जनचेतना अभिवृद्धि गर्नुका साथै परम्परागत सीप, सांस्कृतिक सम्पदा र जीविकोपार्जनको संरक्षणमा यस क्षेत्रले पुर्याएको योगदानलाई उजागर गर्नु रहेको थियो।आफ्नो सम्बोधनमा मन्त्री भोटियाले नाम्ची जिल्लाकी शीतल तामाङलाई आज नयाँ दिल्लीमा राष्ट्रिय हस्तकरघा पुरस्कार प्रदान गरिएको उल्लेख गर्दै यस उपलब्धिलाई सिक्किमको हस्तकरघा क्षेत्रको इतिहासमा महत्वपूर्ण उपलब्धिका रूपमा स्मरण गरिने बताए। उनले यस सम्मानले राज्यका अन्य बुनकरहरूलाई पनि प्रेरणा दिने विश्वास व्यक्त गरे।मन्त्रीले राज्यमा हस्तकरघा क्षेत्रलाई सुदृढ़ र विकास गर्न विभागले गरिरहेको प्रयासबारे चर्चा गर्दै बुनकरहरूको सीप अभिवृद्धि तथा गुणस्तरीय हस्तकरघा उत्पादनमा विशेष जोड दिइएको बताए। साथै, राज्य सरकार र विभागले महिला सशक्तीकरण, आर्थिक आत्मनिर्भरता तथा महिलाहरूलाई ‘सुनौलो, समृद्ध अनि समर्थ सिक्किम’ को परिकल्पना साकार पार्ने अभियानमा अर्थपूर्ण योगदान गर्न अवसर सिर्जना गरिरहेको उल्लेख गरे।उनले मुख्यमन्त्रीको आह्वानमा शुरु गरिएको हप्तामा एक दिन परम्परागत पोशाक लगाउने पहलको पनि प्रशंसा गर्दै यस्तो अभियानले राज्यको समृद्ध सांस्कृतिक सम्पदाको संरक्षण र प्रवर्द्धनमा महत्वपूर्ण भूमिका खेल्ने बताए। साथै, सिक्किममा हस्तकरघा उद्योगको भविष्य उज्ज्वल रहेको विश्वास व्यक्त गरे।कार्यक्रमका क्रममा बुनकरहरूलाई बुनकर परिचयपत्र तथा यार्न पासबुक वितरण गरिएको थियो। साथै, स्वयं सहायता समूहहरूलाई बुनाई कार्यलाई प्रोत्साहन गर्न आवश्यक कच्चा पदार्थ पनि हस्तान्तरण गरिएको थियो।