मोदी सरकारको १२ वर्ष पूरा भएकोमा भाजपा सिक्किमले राजधानीमा जनकल्याण शिविर आयोजन गऱ्यो

गान्तोक, 19 जून । मोदी सरकारको १२ वर्ष पूरा भएको अवसरमा भारतीय जनता पार्टी (भाजपा) सिक्किमले राजधानीको एमजी मार्गमा आज जनकल्याण शिविर आयोजना गरेको छ। यस शिविरमार्फत केन्द्र सरकारका प्रमुख जनकल्याणकारी योजनाहरू प्रत्यक्ष रूपमा जनतासम्म पुऱ्याइएको छ।
गान्तोक तथा छेउछाउका क्षेत्रका योग्य लाभार्थीहरूले आयुष्मान भारत योजना र ई-श्रम योजना अन्तर्गत तत्काल सेवा तथा सहायता प्राप्त गरे। साथै, उनीहरूलाई सामाजिक सुरक्षा, स्वास्थ्य सेवा, वित्तीय समावेशीकरण तथा जीविकोपार्जन अभिवृद्धिसँग सम्बन्धित विभिन्न केन्द्र सरकारका योजनाहरूको विस्तृत जानकारी र परामर्श पनि प्रदान गरिएको थियो।
शिविरमा १२ वर्षमा मोदी सरकारद्वारा हासिल गरिएका महत्वपूर्ण उपलब्धिहरूलाई समेटिएको विशेष प्रदर्शनी पनि आयोजना गरिएको थियो। जनचेतना अभिवृद्धिका लागि सूचना सामग्री पनि वितरण गरियो। कार्यक्रममा नागरिकहरूको उत्साहजनक सहभागिताले ‘सेवा, सुशासन र गरीब कल्याण’ को अवधारणामा आधारित कल्याणकारी योजनाहरूको प्रभाव बढ्दै गएको संकेत दिएको भाजपा सिक्किमले बताएको छ।
कार्यक्रम संयोजक निरेन भण्डारीको नेतृत्वमा सम्पन्न भएको थियो भने प्रदेश महासचिव दिनेशचन्द्र नेपाल, गान्तोक जिल्ला अध्यक्ष पेम्पो दोर्जी लेप्चा, पार्टीका वरिष्ठ पदाधिकारीहरू तथा भाजपा सिक्किमको प्राविधिक टोलीको उपस्थिति रहेको थियो।
जनकल्याण शिविर २० जून, २०२६ सम्म जारी रहनेछ। आयोजकहरूले सबै योग्य नागरिकहरूलाई शिविरमा सहभागी भई उपलब्ध सेवा तथा सुविधाहरूको लाभ लिन आग्रह गरेका छन्।