राज्य वन एवं पर्यावरण विभागको ध्वजवाहक पहल ‘ग्रीन वक’ राज्यव्यापी रूपमा सम्पन्न

गान्तोक, 11 जुलाई। पर्यावरण पर्व 2025 समारोहको एक भागको रूपमा राज्य वन एवं पर्यावरण विभागले आज राजधानीमा आफ्नो ध्वजवाहक पहल ‘ग्रीन वक’ सफलतापूर्वक आयोजन गऱ्यो। मुख्यमन्त्री प्रेमसिंह तामाङको दूरदर्शी नेतृत्वमा 2023 मा शुरू गरिएको ग्रीन वक ग्रिन वाक एक जनआन्दोलनमा परिणत भएको छ, जसले सिक्किमको अग्रणी हरित शासनलाई प्रतिबिम्बित गर्दछ।
यसपाली ग्रीन वक राज्यका सबै छवटा जिल्लामा एकसाथ सम्पन्न गरियो। राजधानीमा एनबी भण्डारी डिग्री कलेज गेट, टाइटेनिक पार्क र स्यारी ट्याक्सी स्ट्याण्डबाट शुरू भयो र देवरालीस्थित वन सचिवालयमा आइपुगेर समापन भयो। यो केवल पैदल यात्रा मात्र नभई शून्य फोहोर र प्लास्टिकमुक्त पहल थियो, जसले एकता, जलवायु चेतना र स्वस्थ जीवनको सन्देश सम्प्रेषण गरेको राज्य वन तथा पर्यावरण विभाग मन्त्री पिन्चो नामग्याल लेप्चाले विज्ञप्तिमा बताएका छन्।
यस पहलको उद्देश्य कार्बन उत्सर्जन घटाउनु, स्वस्थ जीवनशैली प्रबर्द्धन गर्नु, सामुदायिक संलग्नता सुनिश्चित गर्नु र इन्धन संरक्षण गर्नु रहेको बताइएको छ। मन्त्री लेप्चाले आज कार्यक्रममा सहभागी बन्ने सबैलाई धन्यवाद दिएका छन्। यो ग्रीन वकले हामीले चाल्ने प्रत्येक कदम भावी पुस्ताका लागि सफा, स्वस्थ र दिगो सिक्किम निर्माण गर्ने प्रतिबद्धताको स्मरण गराउॅंछ भनी उनले बताएका छन्।