रिम्बी सिङ्लिताम पैह्रो प्रभावित परिवारलाई राहत सामग्री र अनुग्रह सहायता प्रदान

गेजिङ, 23 अगस्त। रिम्बी-सिङ्लिताम क्षेत्रमा गएको पैह्रोबाट प्रभावित परिवारहरूको अवस्था बुझ्न मन्त्री तथा क्षेत्र विधायक छिरिङ टी. भोटियाले गेजिङका जिल्लापाल तेन्जिङ डी. डेन्जोङ्पासहित प्रभावित क्षेत्र तथा राहत शिविरको स्थलगत निरीक्षण गरेका छन्। निरीक्षणका क्रममा पैह्रोका कारण घर-जग्गा, कृषि बाली तथा जमिनमा क्षति पुगेका र केही आवासीय संरचनासमेत जोखिममा परेका २५ प्रभावित परिवारलाई अनुग्रह सहायता तथा राहत सामग्री हस्तान्तरण गरिएको छ।प्रभावित परिवारलाई सम्बोधन गर्दै मन्त्री तथा क्षेत्र विधायक भोटियाले सरकार यस घटनाप्रति गम्भीर रहेको र प्रभावित क्षेत्रको अवस्थालाई निरन्तर निगरानी गरिरहेको बताए। उनले प्रभावित परिवारलाई सरकार तथा जिल्ला प्रशासनबाट निरन्तर सहयोग र आवश्यक सहायता उपलब्ध गराइने आश्वासन दिए।उनले थप क्षति रोक्न आवश्यक सुरक्षात्मक तथा रोकथामका उपायहरू यथाशीघ्र अघि बढाइने जानकारी दिँदै वर्तमान भौगोलिक अवस्थालाई ध्यानमा राखेर प्रभावित परिवारलाई जिल्ला प्रशासनद्वारा जारी सुरक्षा निर्देशन तथा सूचनाहरू पालना गर्न र सतर्क रहन आग्रह गरे।जिल्लापाल डेन्जोङ्पाले स्थलगत निरीक्षण तथा क्षतिको मूल्याङ्कनपछि अनुग्रह सहायता उपलब्ध गराइएको जानकारी दिए। युक्समका राजस्व अधिकारीको नेतृत्वमा भूमि राजस्व टोलीले गरेको स्थलगत सत्यापन तथा सम्बन्धित पञ्चायतबाट प्राप्त सिफारिसका आधारमा लागू एसडीआरएफ/एनडीआरएफ मापदण्ड तथा निर्देशिका अनुरूप सहायता वितरण गरिएको उनले बताए।जिल्लापालले गत आइतबार प्रभावित क्षेत्रको विस्तृत निरीक्षण गरी घर-जग्गा, कृषि बाली तथा जमिनमा भएको क्षतिको मूल्याङ्कन गरिएको जानकारी दिए। विशेषगरी क्षति भएको तथा मानव जीवन र सम्पत्तिमा थप जोखिम हुनसक्ने क्षेत्रलाई प्राथमिकतामा राखेर निरीक्षण गरिएको उनले बताए। प्रभावित परिवारसँग जिल्ला प्रशासनले निरन्तर सम्पर्कमा रही अवस्थाको नजिकबाट निगरानी गरिरहेको पनि उनले उल्लेख गरे।थप क्षति रोक्न आवश्यक सुरक्षात्मक संरचना निर्माण, उचित जलनिकास तथा झोडाको व्यवस्थापनलगायतका उपायहरू अघि बढाइरहेको जिल्ला उनले बताए। प्रभावित परिवारको सुरक्षालाई ध्यानमा राख्दै आवश्यकता परे हाल सञ्चालनमा रहेको राहत शिविरलाई थप सुरक्षित र उपयुक्त स्थानमा स्थानान्तरण गरिने पनि उनले जानकारी दिए।पैह्रो प्रभावित परिवारका लागि जिल्ला प्रशासनले तत्काल राहतस्वरूप उपलब्ध गराएको अनुग्रह सहायता क्षतिको मूल्याङ्कन तथा निर्धारित मापदण्डअनुसार योग्य लाभग्राही पहिचान गरी वितरण गरिएको जनाइएको छ। यसैबीच, सिक्किम वीर गोर्खा पूर्वसैनिक कल्याण संघले पनि मानवीय सहयोगस्वरूप राहत शिविरमा रहेका प्रभावित परिवारलाई कम्बल तथा आवश्यक खाद्यान्नसहितका राहत सामग्री हस्तान्तरण गरेको छ।जिल्ला प्रशासनले प्रभावित क्षेत्रको अवस्थालाई निरन्तर निगरानीमा राख्दै प्रभावित परिवारको सुरक्षा तथा कल्याण सुनिश्चित गर्न आवश्यक राहत, सहायता र रोकथामका उपायहरू प्रभावकारी रूपमा अघि बढाइरहेको जनाएको छ।