सिक्किम अकादेमीको सातौँ साधारण परिषद्को पहिलो सभा सम्पन्न

सिक्किम अकादेमीको सातौँ साधारण परिषद्को पहिलो सभा 25 मार्च 2026-को दिन नवनियुक्त अध्यक्ष प्रवीण राई जुमेलीको अध्यक्षतामा सम्पन्न भयो। अकादेमीको सम्मेलनकक्षमा सम्पन्न सभामा उपस्थित नवनियुक्त साधारण परिषदका सदस्यहरूलाई अध्यक्ष जुमेलीले खदार्पण गरेर स्वागत जनाउँदै सातौँ कार्यकालमा अकादेमीले भाषा, साहित्य, संस्कृति र कलाको सम्वर्द्धन र विकासका निम्ति सुझाउहरू आग्रह गरे। उनले अकादेमीको उद्देश्यमाथि पनि प्रकाश पारे। अकादेमीको सातौँ साधारण परिषद सदस्यको सभामा आज उपाध्यक्ष एसटी ग्याछो, महासचिव पूर्ण योञ्जन, सचिव प्रशासन पीएल शर्मा, सचिव साहित्य प्रद्युम्न श्रेष्ठ, नेशनल इन्स्टीट्यूट अफ् टिबेटोलोजीका संसाधन अधिकारी छुलछिम ग्याछो, पद्मश्री पुरस्कार विजेता जोर्डन लेप्चा, शिक्षा विभागका निर्देशक एडी छेत्री, नेपाली साहित्य परिषद्का महासचिव भीम राउत, कवि अमर बानियाँ लोहोरो, सिक्किम सरकारका विशेष अधिकारी विष्णु राणा र चित्रकार एवम् कलाकार सेवन राईको उपस्थिति थियो। सभामा उपस्थित साधारण परिषद सदस्यहरूले नवनियुक्त अध्यक्ष प्रवीण राई जूमेलीलाई बधाई दिँदै भविष्यमा अकादमीद्वारा भाषा, साहित्य, संस्कृति र कलाको क्षेत्रमा गरिनुपर्ने कार्यहरूबारे आ-आफ्नो सुझाउ राखे। अध्यक्ष जुमेलीले उपस्थित सदस्यहरूद्वारा राखिएका सुझाउहरूलाई सकारात्मक रूपमा लिएर भविष्यमा पहल गरिने बताए।
अकादेमीका महासचिव पूर्ण योञ्जनले पछिल्लो कार्यकालमा अकादेमीद्वारा गरिएका उल्लेखनीय एवम् उपलब्धिमूलक कार्यहरूबारे विस्तृत जानकारी गराए। सचिव प्रशासन पीएल शर्माले पुस्तक प्रकाशन एवम् वितरण सम्बन्धि हालै अकादेमीद्वारा लिइएको निर्णयबारे सभालाई अवगत गराए। सचिव साहित्य प्रद्युम्न श्रेष्ठले आज पहिलो सभामा उपस्थित भई बहुमूल्य सुझाउहरू राखेवापत अकादेमीका साधारण परिषदका सदस्यहरूप्रति कृतज्ञता प्रकट गर्दै सभा फलदायक भएको मन्तव्य गरे।