सीएपीले अड-इभन नियमको विरोध जनायो, आवश्यक परे लोकतान्त्रिक कदम चाल्ने

गान्तोक, 23 मई । सिटिजन एक्सन पार्टी (सीएपी) सिक्किमको महत्वपूर्ण सांगठनिक बैठक आज रानीपुलस्थित पार्टीको मुख्य कार्यालयमा पार्टी अध्यक्ष गणेश कुमार राईको अध्यक्षतामा सम्पन्न भयो। उक्त बैठकमा पार्टीका सल्लाहकार, वरिष्ठ उपाध्यक्ष, उपाध्यक्ष, प्रभारी महासचिव (संगठन), महासचिव (प्रशासन), जिल्ला अध्यक्षहरू तथा प्रचारप्रसार विभागका प्रतिनिधिहरूको उपस्थिति रहेको प्रेस विज्ञप्तिमा उल्लेख छ।बैठकमा पार्टी तथा संगठन विस्तारका विभिन्न रणनीतिहरूमाथि व्यापक छलफल गरियो। यस अवसरमा पार्टीका नेता दिपेन्द्र राईको सम्पादनमा प्रकाशित पार्टी बुलेटिनको पार्टी अध्यक्षले विमोचन गरे। सभाले राज्यका नागरिकहरूको हित र जनसरोकारका विषयलाई केन्द्रमा राख्दै विभिन्न प्रस्तावहरू सर्वसम्मत रूपमा पारित गरेको बताइएको छ।वर्तमान राज्य सरकारले राज्यभर लागू गरेको अड-इभन नियमप्रति विरोध जनाउँदै आवश्यक परे कुनै पनि लोकतान्त्रिक कदम चाल्न तयार रहेको निर्णय गर्दै प्रस्ताव पारित गरिएको छ। सीएपीले राज्यका नागरिकहरूको हकहित, सामाजिक न्याय तथा लोकतान्त्रिक मूल्य-मान्यताको संरक्षणप्रति प्रतिबद्ध दोहोर्याएको छ।