सांसद डा इन्द्रहाङ सुब्बाको परिकल्पनामा आरम्भ भएको मासिक कार्यक्रम ‘द क्वेस्ट’-को दोस्रो संस्करण आज गान्तोकको नरबहादुर भण्डारी सरकारी महाविद्यालयमा सम्पन्

गान्तोक, 18 नोभेम्बरः सिक्किमका लोकसभा सांसद डा इन्द्रहाङ सुब्बाको परिकल्पनामा आरम्भ भएको मासिक कार्यक्रम ‘द क्वेस्ट’-को दोस्रो संस्करण आज गान्तोकको नरबहादुर भण्डारी सरकारी महाविद्यालयमा सम्पन्न भयो, जहाँ आईएएस, आईएफएस, आईपीएस र एससीएस अधिकारीहरूले विद्यार्थीहरूसमक्ष प्रेरणादायी वक्तव्य राखे।
सांसद डा सुब्बाले विभिन्न क्षेत्रमा सफलता हासिल गरेका व्यक्तित्त्वहरूलाई बोलाएर उनीहरूको संघर्षका कथा र सफलताका कडीहरू सुनाउनका साथै वर्तमान युवापिँढीलाई उज्ज्वल भविष्यतर्फ अभिप्रेरित गर्ने दिशामा संसद कार्यालयद्वारा यस प्रकारको पहल गरिएको मन्तव्य गरे। विद्यार्थी तथा युवा पुस्ताका निम्ति केही लाभ पुगोस् भन्ने उद्देश्यले आयोजन गरिएको यस मासिक कार्यक्रमबाट लाभ उठाउन उनले विद्यार्थीहरूलाई आह्वान पनि गरे।
आजको कार्यक्रममा गान्तोक जिल्लाका पुलिस अधिक्षक आईपीएस तेञ्जिङ लोदेन लेप्चा, जिल्लापाल आईएएस तुषार जी. निखारे, वाणिज्य एवम् उद्योग विभागका निर्देशक आईएफएस रविकुमार अनि सामाजिक कल्याण विभागकी सचिव एससीएस सारिका प्रधानले आ-आफ्नो क्षेत्रमा हासिल गरेका सफलताका कथाहरू सुनाउँदै विद्यार्थीहरूसमक्ष प्रेरणादायी विचार र बहुमूल्य सुझाउहरू राखे। यस अवसरमा विद्यार्थी र अधिकारीहरूमाझ अन्तरक्रियात्मक कार्यक्रम पनि आयोजन गरिएको थियो।