गान्तोक, 22 अप्रेल। भारतीय जनता पार्टी, सिक्किमले हालै देशको संसदमा पारित भएको वक्फ संशोधन ऐन, 2025 लाई लिएर आज सिङ्तामस्थित आफ्नो प्रदेश कार्यालयमा एउटा जागरूकता कार्यक्रम आयोजना गऱ्यो। कार्यक्रममा प्रदेश अध्यक्ष डीआर थापा लगायत पार्टीका वरिष्ठ पदाधिकारीहरू र मुस्लिम समुदायका प्रतिनिधिहरूको उपस्थिति थियो।
सभालाई सम्बोधन गर्दै प्रदेश अध्यक्ष डीआर थापाले वक्फ संशोधन ऐनको स्वागत गर्दै यसले वक्फ सम्पत्तिको पारदर्शिता र दक्षतालाई वृद्धि गर्दै गरीब मुस्लिम समुदायलाई सशक्तिकरण गर्ने सम्भावनाहरू समेटेको बताए। उनले मोदी सरकारको समावेशी विकासको प्रतिबद्धता र सबका साथ, सबका विकास को दृष्टिकोणको प्रशंसा गरे।
स्थानीय मुद्दाहरूमा बोल्दै, थापाले शहरी र ग्रामीण सिक्किममा हालै भएको ट्रेड लाइसेन्स शुल्क, पसल भाडा, बिजुली बिल र फोहोर शुल्क वृद्धिप्रति कडा असन्तुष्टि व्यक्त गरे। उनले सिक्किमका नागरिकहरूले आर्थिक कठिनाइको सामना गरिरहेको र मनरेगा ज्याला, डेरी प्रोत्साहन राशि र पेन्सन जस्ता भुक्तानीमा भएको ढिलाइले यो कठिनाइ थप बढेको बताए। राज्य सरकारको शुल्क वृद्धिलाई असंवेदनशील भन्दै थापाले मुख्यमन्त्रीलाई यी वृद्धिहरू पुनर्विचार गर्न र नागरिकहरूलाई राहत र स्थिरता प्रदान गर्न ज्याला र प्रोत्साहन समयमै वितरण गर्न आग्रह गरे।
यसअघि, प्रदेश महामन्त्री अर्जुन राईले मोदी सरकार सबै समुदायको समान विकासप्रति समर्पित रहेको बताउँदै वक्फ संशोधन ऐनलाई लिएर अधिक्तम राज्यहरूमा खुशीको लहर रहेको बताए।
यस अतिरिक्त, कार्यक्रममा अवकाश प्राप्त सरकारी कर्मचारी, पूर्व पञ्चायत सदस्य र क्षेत्रीय पार्टीका कार्यकर्ताहरू औपचारिक रूपमा भाजपामा सामेल भएको बताइएको छ।
