एसएसपीएले पॉंचौं राज्य र दोस्रो खुल्ला एसबीडी च्याम्पियनशिप आयोजना गर्ने

गान्तोक, 30 अगस्त। सिक्किम स्टेट पावरलिफ्टिङ एसोसिएशन (एसएसपीए) ले आगामी 12, 13 र 14 सेप्टेम्बरका दिन पॉंचौं राज्य र दोस्रो खुल्ला एसबीडी च्याम्पियनशिप 2025 आयोजना गरिरहेको छ। उक्त च्याम्पियनशिपमा सिक्किम लगायत राज्य बाहिर अनि नेपालबाट पनि प्रतियोगीहरूले भाग लिइरहेका छन्।
सिक्किम स्टेट पावरलिफ्टिङ एसोसिएशनका सह-कोषाध्यक्ष रन्जीत शर्माले आज राजधानीमा आयोजित एक पत्रकार सम्मेलनमा उक्त जानकारी दिए। उनले भने, उक्त प्रतियोगिता तादोङस्थित नर बहादुर भण्डारी डिग्रीको प्रेक्षागृहमा आयोजना गरिने छ। सिक्किम राज्य स्थापनाको 50औं वर्षको थीममा आयोजना गरिने यस प्रतियोगितामा सिक्किम लगायत राज्य बाहिर अनि नेपालबाट पनि सहभागिता रहनेछ।
उनले विगतका वर्षहरूको तुलनामा यसपाली प्रतिस्पर्धीहरूको संख्या अधिक रहने पनि जानकारी गराए। यसपाली लगभग 200 प्रतिभागी सहभागी बन्न उनले बताए। उनले 5औं आइरन म्यान र आइरन वुमन लगायत सब-जुनियर, जुनियर, सिनियर र मास्टर (पुरुष/महिला) वर्ग अन्तर्गत प्रतियोगिता सम्पन्न गरिने बताए। उनले प्रतियोगिताको निष्पक्षता सुनिश्चित गर्न निर्णायकहरू पनि सबै बाहिरबाट आइरहेको बताए।
एसोसिएशनका महासचिव देवेन्द्र बस्नेतले यो प्रतियोगिता एक चयन परीक्षण पनि रहेको अवगत गराउॅंदै यस प्रतियोगिताका विजेताहरूले आगामी जनवरी महिनामा हरियाणामा हुने बेञ्च प्रेस च्याम्पियनशिपमा भाग लिने अवसर पाउने बताए।