राज्य पर्यटन विभागलाई ‘भारतको सबैभन्दा पर्यटक मैत्री राज्य’ पुरस्कार

गान्तोक, जनवरी । सिक्किम सरकारको पर्यटन तथा नागरिक उड्डयन विभाग ९ देखि ११ जनवरी, २०२६ सम्म सिलगढीको स्थानीय एक होटलमा आयोजित बंगाल ट्राभल मार्टको ०९ औं संस्करणमा प्रतिष्ठित ‘भारतको सबैभन्दा पर्यटक मैत्री राज्य’ पुरस्कारले सम्मानित बनेको छ। उक्त जानकारी पर्यटन तथा नागरिक उड्डयन विभागले आज एक प्रेस विज्ञप्तिमा बताएको छ।
बंगाल ट्राभल मार्ट २०२६ पूर्वी भारतको सबैभन्दा महत्त्वपूर्ण पर्यटन व्यापार कार्यक्रमहरू मध्ये एक हो, जसले भारत र विदेशका पर्यटन सरोकारवालाहरू, नीति निर्माताहरू, खरीददारहरू, विक्रेताहरू र मिडियालाई गतिशील मञ्च प्रदान गर्दछ। उक्त पुरस्कार विभागकी अतिरिक्त सचिव डा. प्रेरणा चामलिङले ग्रहण गरिन्। कार्यक्रममा राज्यको प्रतिनिधित्व गर्दै विभागका अधिकारी र कर्मचारीहरू सक्रिय रूपमा भाग लिएका थिए।
विभागले भनेको छ, यो मान्यताले पर्यटन विकास, आगन्तुक व्यवस्थापन, दिगोपना र समुदायमा आधारित पर्यटनमा उत्कृष्ट अभ्यासहरू लागू गर्न सिक्किम सरकारको निरन्तर प्रयासलाई प्रतिबिम्बित गर्दछ। यो पुरस्कार पर्यटन क्षेत्रमा सुशासन, पर्यावरणमैत्री नीतिहरू, आतिथ्य मापदण्डहरू र समावेशी वृद्धिप्रति राज्यको प्रतिबद्धताको प्रमाण पनि हो।