जन साधारणलाई आतङ्कित नहुन तर, सतर्क र तयार बस्न एसएसडीएमएको सुझाउ

गान्तोक, 09 फरवरी। सिक्किम राज्यमा हालैका भूकम्पका घटनाहरूलाई ध्यानमा राख्दै राज्य आपदा प्रबन्धन प्राधिकरण (एसएसडीएमए) ले जन साधारणलाई आतङ्कित नहुन, तर सतर्क र तयार बस्न आह्वान गरेको छ।
एसएसडीएमएले जन साधारणलाई सम्बोधन गर्दै आज जारी गरेको एक सूचनामा भूकम्प प्राकृतिक भूगर्भीय घटना रहेको र निश्चित रूपमा भविष्यवाणी गर्न नसकिने बताएको छ। सिक्किम भूकम्पीय क्षेत्र VI अन्तर्गत पर्ने भएकाले चिन्ताको कुनै कारण नरहेको जनाउॅंदै सबै नागरिकहरूलाई सतर्क रहन र आधारभूत स्तरको तयारी राख्नु महत्त्वपूर्ण रहेको प्राधिकरणले सुझाउ पनि दिएको छ।
एसएसडीएमए र जिल्ला आपदा प्रबन्धन प्राधिकरणले भूकम्पको बारेमा जनतालाई सचेत गराउन र सबै सम्बन्धित निकायहरूको तयारीको परीक्षण गर्न नियमित रूपमा मक-ड्रिल अभ्यासहरू सञ्चालन गरिएको जानकारी गराएको छ। यसरी नै प्राकृतिक प्रकोपहरूप्रति राज्यका विद्यालयहरूमा जागरूकता कार्यक्रमहरू पनि सञ्चालन गरिएको जनाएको छ।
प्राधिकरणले मानिसहरूलाई शान्त रहन र अफवाह वा अप्रमाणित जानकारी नफैलाउन, सरकार र अधिकृत निकायहरूद्वारा जारी आधिकारिक एड्भाइजरीहरू मार्फत सूचित रहन, घर, कार्यस्थल र सार्वजनिक स्थलहरूमा सुरक्षित स्थानहरू पहिचान गर्न र भूकम्पको समयमा मानक भूकम्प सुरक्षा उपायहरू पालना गर्न सुझाउ दिएको छ।
प्राधिकरणले सम्बन्धित सबै विभागहरूले परिस्थितिलाई नजिकबाट निगरानी गरिरहेको बताउॅंदै आवश्यक तयारी उपायहरू लागू गरिएको पनि बताएको छ। एसएसडीएमएले मानिसहरूलाई आतङ्कित हुनुपर्ने कुनै कारण नभए पनि सुरक्षा सुनिश्चित गर्नका लागि जनताबाट सहयोगको लागि अनुरोध गरेको छ।