सिक्किमका कलाकारहरूको प्रवर्द्धन र उत्थानमा सिक्किम अकादेमीले सबै सम्भव सहयोग र समर्थन प्रदान गर्ने आश्वासन

गान्तोक, 21 मार्च। ओविया आर्ट सर्कल (ओएसी), सिक्किमकी अध्यक्ष दीपा राईसहित वरिष्ठ सदस्यहरूले सिक्किम अकादेमीका अध्यक्ष प्रवीण राई ‘जुमेली’ सँग भेट गरी सिक्किम अकादेमीको अध्यक्ष पदमा मनोनीत भएकोमा बधाई दिएको छ। यसैगरी, आगामी २४ मार्च, २०२६ का दिन दक्षिण सिक्किम साहित्य सम्मेलनको ३१औं स्थापना दिवसमा ‘शिवकुमार राई स्मृति पुरस्कार’ द्वारा सम्मानित हुन लागेकोमा पनि अध्यक्ष राईलाई ओएसीले बधाई दिएको छ।
यस सौहार्दपूर्ण भेटघाटमा कलाबारे चर्चा-परिचर्चा भएको ओएसी सिक्किमले आज प्रेस बयानमा बताएको छ। यसै क्रममा ओएसीकी अध्यक्षले सिक्किम अकादेमीका नवनियुक्त अध्यक्ष जुमेलीलाई कलाकारहरूका लागि अवसर र एक्सपोजर प्रदान गर्न कला प्रदर्शनी, कार्यशाला र सेमिनार जस्ता पहलहरू आयोजना गर्न अनुरोध गरिन्।
ओएसी सिक्किमका कार्यकारीहरूलाई सम्बोधन गर्दै जुमेलीले प्रदर्शनी र कार्यशालाहरूको अतिरिक्त अकादेमीले आर्ट एण्ड लिटरेचर रेजीडेन्सी कार्यक्रमको योजना बनाउने प्रक्रियामा रहेको जानकारी गराए। यो पहल उदीयमान कविहरू र वरिष्ठ कलाकारहरूलाई एकै ठाउँमा ल्याउने उद्देश्यले गरिने, जसले गर्दा उनीहरूलाई एउटै छानामुनि सहकार्य र काम गर्न अवसर प्रदान गर्नेछ।
समकालीन कला अभ्यासहरूको महत्त्वलाई जोड दिँदै उनले कलाकारहरूलाई उदीयमान प्रतिभालाई प्रेरित गर्न नवीन र रचनात्मक काम गर्न प्रोत्साहित गरे। कलाकारिताको सन्दर्भमा उनले मात्रा भन्दा गुणस्तरलाई प्राथमिकता दिनुपर्छ भन्ने कुरामा जोड दिए। गुणस्तरको छ भने एउटै कलाकृति कलाकारको निमित्त पहिचान बन्न सफल बन्ने उनको भनाई थियो।
साथै, अध्यक्ष जुमेलीले सिक्किमका कलाकारहरूको प्रवर्द्धन र उत्थानमा सिक्किम अकादेमीले सबै सम्भव सहयोग र समर्थन प्रदान गर्ने आश्वासन पनि दिए।