मुख्यमन्त्रीले प्रधानमन्त्री मोदीसॅंग भेट गरे, प्रमुख विकास प्राथमिकताहरू र उदीयमान आवश्यकताहरूबारे चर्चा गरे

गान्तोक, 08 अप्रेल । मुख्यमन्त्री प्रेमसिंह तामाङले प्रधानमन्त्री नरेन्द्र मोदीलाई भारतमा सबैभन्दा लामो समयसम्म सरकार प्रमुख बन्ने उल्लेखनीय कोसेढुङ्गा हासिल गरेकोमा हार्दिक बधाई दिएका छन्। यसैगरी, उनले प्रधानमन्त्रीलाई सिक्किमको प्रमुख विकास प्राथमिकताहरू र उदीयमान आवश्यकताहरूबारे पनि जानकारी गराएका छन्।
मुख्यमन्त्री तामाङले आज नयॉं दिल्लीमा प्रधानमन्त्री नरेन्द्र मोदीसॅंग शिष्टाचार भेट गरी न्यानो, सौहार्दपूर्ण र अर्थपूर्ण अन्तरक्रिया गरेको मुख्यमन्त्री कार्यालयले एक प्रेस बयानमा बताएको छ। यस भेटका क्रममा मुख्यमन्त्रीले भारतमा सबैभन्दा लामो समयसम्म सरकार प्रमुख बन्ने उल्लेखनीय कोसेढुङ्गामा हासिल गरेकोमा प्रधानमन्त्रीलाई हार्दिक बधाई दिए।
मुख्यमन्त्रीले प्रधानमन्त्री समक्ष सिक्किमका प्रमुख विकास प्राथमिकताहरू र उदीयमान आवश्यकताहरूबारे जानकारी गराउॅंदै पूर्वाधार विकास, दिगो विकास र जनताको समग्र कल्याण जस्ता क्षेत्रहरूमा सहयोगलाई थप सुदृढ़ पार्ने उपायहरूबारे छलफल गरे। यस अतिरिक्त, उनले आगामी जून २०२६ देखि नथुला पास व्यापार मार्ग (सिल्क रुट) पुन: खोलिने भएकोमा प्रधानमन्त्रीलाई हार्दिक कृतज्ञता व्यक्त गरे। यस कदमले स्थानीय समुदायका साथै व्यापारिक समुदायलाई पनि उल्लेखनीय रूपमा फाइदा पुर्‍याउने अपेक्षा गरिएको उनले अवगत गराए।
यसबाहेक, मुख्यमन्त्रीले सिक्किम राज्य स्थापनाको स्वर्ण जयन्तीको समापन समारोहमा प्रधानमन्त्रीलाई निमन्त्रणा दिए, जसलाई प्रधानमन्त्रीले स्वीकार गरेको बताइएको छ। उनले सिक्किम राज्यको दिगो प्रगति र समृद्धिको लागि भारत सरकारले प्रदान गरेको निरन्तर मार्गदर्शन, प्रोत्साहन र अटल सहयोगको लागि हार्दिक कृतज्ञता व्यक्त गरे।